!@#$%&? / evt. finn ein feil

Det er heller regelen enn unntaket at plagga eg strikkar etter oppskrift ikkje vert heilt 100 % som dei skal. Sidan eg er av den late typen orkar eg aldri å rekkja opp att for å ordna feilen. Plagga vert stort sett brukbare.

Men i dag må eg rekkja opp. Eg har gjort min aller største strikkefeil. Ein feil eg ikkje kan oversjå. Ser du kva som er gale?

Feilen vart først oppdaga då eg hadde strikka så langt at eg skulle dela til ermer. Eg FATTAR ikkje at det er mogleg å strikka ein fjerdedels gensar utan å merka at eg kun har TRE raglanaukningar! G A H !

No vert heile skiten trykt langt bak i skapet til fadesen er gløymt. Som trøyst må eg nesten leggja opp til eit nytt prosjekt, ikkje sant?

 

(Eg var så sur at det einaste biletet eg tok vart elendig. Fargen er mykje finare i verkelegheita. Varm, djup grøn. Og håpet er at gensaren ein gong skal gjenoppstå frå dei evige UFO-marker, men det vert mest sannsynleg ikkje i løpet av denne sesongen, som eg skreiv i forrige innlegg).

Håpar du har ein god dag og at strikketøyet ditt oppfører seg slik som det skal!

Egostrikk

Som eg skreiv i forrige innlegg, så har eg fått sansen for å strikka plagg til meg sjølv.

Akkurat no held eg på med A million stripes loop i diverse restegarn. I vår strikka eg meg ein gul alpakkahals, men han vart altfor stor og tjukk, så han vert nok liggjande ubrukt i skuffa. Denne derimot kjem til å verta mykje brukt. Tynn og lett som ei fjør, men likevel varm og god.

Eg strikkar i diverse restar av totrådsgarn; Shetland soft (blå, turkis og mørkegrå), Holst (kvit) og New Zealand lammeull (lysegrå og petrol). Litt usikker på om eg skal ha med to fargar til (ein endå kvitare og ein annan blåfarge) – det må eg ta opp til vurdering når eg er ferdig med neste stripeblokk.

I tillegg har eg starta på ein gensar, Big Alfred’s. Gensaren er eigentleg til menn, men eg fall pladask og det bryr meg midt bak at det er ein herregensar. Eg trur han vert vel så fin til damer også.

Garnet er DSA Hverdags, eit av mine nye favorittgarn. Det er så mjukt, så mjukt og akkurat passe tjukt. Relativt rimeleg er det også. Dobbel tråd på pinne nummer 5 går radig.

Dessutan er lista over kva eg har lyst til å strikka l   a   n   g (i hvert fall i forhold til mitt strikketempo, evne til å gjera ferdig ting og tilgjengeleg strikketid).

Målet er i alle fall at desse to prosjekta skal verta ferdig før ullsesongen er over, så vil tida visa kor mykje meir eg rekk å strikka til meg sjølv.

Håpar du nyt siste del av helga!

Sokk på sokk på sokk på sokk

Lang tid, ingen innlegg. Ingen forklaring på kvifor, det har berre vorte sånn.

Men eg har strikka i sommar. Sokkar, etter planen.

Dei beige, blåturkise og brune er strikka i Sterk på pinne 2,5. Tidlegare har eg alltid strikka med pinne nummer 3 til det garnet, men etter at eg fekk ein kommentar om at det eine paret eg har strikka med 2,5 tidlegare og gitt vekk, er det beste sokkeparet eigaren har, har eg gått over til 2,5. Det tek litt lenger tid å få sokkane ferdig, men resultatet er verdt det! Solide, stødige sokkar og nøgd mottakar. Til sokkar i størrelse 43isj med lang vrangbord held det med to nøster, så garnet er drygt i bruk.

Det lilla paret er strikka i Perfect på pinne nummer 3. Sidan eg ikkje er så begeistra for dette garnet meir, prøver eg å strikka opp Perfectlageret mitt. Etter denne sommaren ser eg verkeleg ein ende på det.

Elles på strikkefronten har eg begynt på haust- og vintergarderoben til meg sjølv! Er det ikkje typisk at når ein burde bruka tida på å strikka julegåver, så dukkar det opp side på side med plagg eg fell pladask for?

Vel, kanskje eg må fira litt på krava og gå for kjøpte gåver i år. I kveld vert det uansett egostrikk i sofakroken, for ute høljar det ned.

Ha ein fabelaktig laurdagskveld, du som er innom!

Garnvurdering: sokkegarn, del 1

Langt innlegg

Sidan eg har strikka veldig mange sokkar og då naturleg nok kjøpt mykje sokkegarn, tenkte eg at det kunne vera greit med ei vurdering av dei ulike garntypane eg har brukt. Kanskje det kan vera nyttig for andre enn meg også?

Dette er på ingen måte eit fasitsvar på kva slags sokkegarn som er best for alle, det er berre mine erfaringar og meiningar med/om kva som fungerer og ikkje fungerer – alt utifrå meg som strikkerske og familien som brukarar av sokkane.

Eg har ikkje prøvd alt av det som fins av sokkegarn, men eg trur eg har vore gjennom ganske mykje av det som ein får kjøpt på heilt vanlege garnbutikkar. Sidan det er så mange garntypar, så har eg valt å dela opp innlegga, slik at det ikkje vert ei heil avhandling dette her.

Eg vil leggja vekt på korleis garnet er å strikka med, pris, fargeutval og aller viktigast, korleis garnet held seg og oppfører seg i bruk og vask.

Sterk frå Du store alpakka

Fiber: 40 % ull, 40 % alpakka, 20 % nylon.
Pris: 41 kroner for 50 gram. Eg bruker to nøster til damesokkar og litt meir enn to til herresokkar. Eit av dei dyrare garna eg strikkar med, men grei pris sidan det er alpakka.
Fargeutval: Godt fargeutval. Garnet kjem i både einsfarga og melerte fargar. Her kan du sjå fargekart. Eg saknar gult.
Strikkeopplevelse: Garnet er veldig godt å strikka med. Det er mjukt som smør og glir godt på pinnane. Sokkane vert tette og gode og herleg “hårete” på grunn av alpakkaen. Eg opplever likevel ikkje at garnet røyter, slik som mange andre alpakkagarn eg har strikka med.
I bruk: Somme tykkjer at dette garnet sig etter ei tids bruk, men det har ikkje eg opplevd. Eg strikkar alltid med pinne 2.5 eller 3, sjølv om oppgitt pinnestorleik er 3.5 mm. Elles loar det litt, men det gjer ingenting for meg/oss. Garnet er slitesterkt, ingen av para har antydning til hol, sjølv om dei er godt brukte. Sokkane er varme.
I vask: Det står på lappen på garnet at det kan vaskast i maskin på 30 grader, så her har alle para vorte vaska på ullvask, 30 grader og med ullvaskemiddel. Likevel er alle sokkane skikkeleg tova og kompakte. Sokkane er vaska i to ulike vaskemaskiner og det same har skjedd, så eg trur ikkje det er maskinene sin feil heller. Det er jo godt med tova sokkar, men kjedeleg når dei vert for små.

Før:

Etter:

Mellanraggi frå Järbo

Fiber: 75 % ull, 25 % nylon.
Pris: 69-79 kroner for 100 gram der eg har handla. På dei para eg har strikka har eg brukt mindre enn eitt nøste. Garnet er verkeleg verdt pengane.
Fargeutval: Godt. Finst i sjølvstripande i alle slags fargar og einsfarga grått, kvitt og svart. Kunne godt ha vore litt større utval av einsfarga, men fargerike sokkar som livar opp i sokkeskuffa er jo kjekt også.
Strikkeopplevelse: Garnet er godt å strikka med. Mjukt og glir lett på pinnane. Eg strikkar med pinne nummer 3, som er oppgitt pinnestorleik. Sokkane vert tette og akkurat passe tjukke.
I bruk: Sokkane held seg UTRULEG godt. Dei nuppar eller loar ikkje og er slitesterke. Ingen antydningar til slitasje. Sjølv om dei er brukt i over to år ser dei nesten nye ut.
I vask: Garnet oppfører seg eksemplarisk i vask. Sokkane held fasongen vask etter vask. Ingen toving eller krymping. Tåler maskinvask. Vaska på ullvask, 30 grader og med ullvaskemiddel.

Før:

Etter:

Perfect frå Sandnes

Fiber: 85 % ull, 15 % nylon.
Pris: 27 kroner for 50 gram. Eg treng to nøster til damesokkar, litt mindre enn tre til herresokkar.
Fargeutval: Det har vore dårleg i lang tid, noko som har ført til at eg har strikka x antal par i same farge. Den siste tida har Sandnes komme med nye fargar, men tre av dei finst frå før (blå, rosa og kvit, berre i andre nyansar).
Strikkeopplevelse: Før tykte eg garnet var godt å strikka med, men i det siste tykkjer eg at garnet har endra seg. Perfect var den absolutte sokkegarnfavoritten før, men no fell det lenger og lenger ned på lista. Garnet er tjukkare enn f.eks. Sterk og PT5. Anbefalt pinnestorleik er 3.5-4 mm, men eg strikkar med 3 mm. Tykkjer det vert slaskete på større pinnar og så er det godt med litt tjukkare og tette sokkar. Dessutan vert dei meir slitesterke når dei er strikka på tynnare pinnar.
I bruk: Eg tykkjer det varierer veldig frå par til par korleis dei held seg. Eit par gonger har eg opplevd at sokkane vert fort holete og veldig nuppete. Kanskje det har vore dårlege nøster, for som regel held sokkane i Perfect seg godt. Dei mistar fasongen litt, men ikkje så mykje at det ikkje går an å bruka sokkane.
I vask: Toler maskinvask. Vaska på ullvask, 30 grader og med ullvaskemiddel. Etter mange vask har sokkane tova seg litt.

Før:

Etter:

Dette paret var ikkje lenge i bruk før det vart både holete og nuppete.

Zauberball frå Schoppel Wolle

Fiber: 75 % ull, 25 % nylon.
Pris: 80 DKK for 100 gram frå www.123knit.com
Fargeutval: 123knit har eit greit fargeutval. Alle nøstene er fleirfarga med ganske lange fargeskift.
Strikkeopplevelse: Garnet er tyyynt, så eg strikka med dobbel tråd på pinne nummer 3. Det var ikkje så veldig godt å strikka med, det kjentes nesten syntetisk ut på pinnane. Garnet var også laust spunne, så det delte seg lett. Ikkje eit garn eg skal kjøpa meir av, for eg tykkjer garnet må vera godt å strikka av.
I bruk: Sokkane har berre vore i bruk eit halvt års tid, men dei har holdt seg ganske godt. Eg strikka berre ei kort vrangbord og glattstrikk resten, så sokkane er litt slaskete, men det er min feil. Hadde nok vore betre i ribbestrikk, men det trur eg gjeld for alt sokkegarn.
I vask: Garnet har oppført seg bra i vask. Det nuppar litt, men ikkje så mykje at det dett av dottar.

Før:

Etter:

Det var det for denne gong. Eg veit ikkje heilt når neste garnvurderingsinnlegg kjem, sidan ein del av sokkane må verta brukt litt meir først.

Jippijei!

E g  e r  f e r d i g  m e d  t e p p e t  !

Under ser de henholdsvis den spede start, som eg blogga om i februar 2009, og neste mellomrunde, som eg blogga om i oktober 2009. Dette er altså ein skikkeleg årgangs-UFO – faktisk trur eg det er det eldste prosjektet eg har hatt liggande.

Under den årlege sommaryddinga av rommet mitt fann eg att kassen med teppet oppi, og eg bestemte meg for at no hadde det verkeleg lege lenge nok til modning. Planen var fleire omgangar, men ikkje hadde eg att garn og ikkje hadde eg lyst til å hekla meir heller, så då sa eg meg fornøgd. Mamma vart kommandert til trådfesting og no er det altså FERDIG!

Størrelsen vart ikkje heilt som planlagd, men eg trur det passar perfekt som treng-litt-varme-på-føtene-medan-ein-sit-i-godstolen-teppe. Dei vitale måla er 115 x 115 cm (ublokka) og det gjekk med 730 gram garn (etter trådfesting). Garnet er ein lett blanding av Safir, Rubin og Østlandsgarn. 

Tre år seinare enn planlagd kan endeleg besta få seg teppe til bursdagen.

Strikkeplanar for sommaren

Sidan eg held på med garnslanking tok eg med meg litt garn frå lageret i by’n heim på sommarferie. Planen er at eg kun skal strikka med det (og det andre garnet eg har heime hjå opphavet) og ikkje kjøpa noko nytt i løpet av desse vekene.

Sokkar har vorte eit fast innslag under juletreet dei siste åra, difor tok eg med litt sokkegarn, så eg kan laga eit lite julepakkelager. Nøster med Mor Aase raggegarn (som er mitt nye favoritt-sokkegarn), Perfect (som fell lenger og lenger ned på lista) og Sterk skal forvandlast til sokkar innan ferien er over.

Eg tok også med tolv nøster med Drops babyalpaca silk, som skal strikkast om til tre-fire sjal. Planen er Little shells, men etter å ha lagt opp, strikka eit godt stykkje og så oppdaga at eg hadde gløymt aukingane på vrangsida på den eine halvdelen, mista eg litt piffen. Eg trur eg strikkar sokkane først, så får eg sjå etterpå om det vert endring i sjalplanane.

Då er det berre til å kvessa pinnane og varma opp strikkemusklane!

Hei igjen

To månadar sidan sist. Strikkelysta har vore borte vekk. Eg har vorte kvalm berre eg har tenkt på strikkepinnar, garnnøster og strikkeforum. I staden for har eg brukt tida mi til skulebøker og lesing. Men no er det sommarferie og eg kjenner at strikketøyet freistar att.

Planen, målet og håpet er at blogginga skal ta seg opp i løpet av sommarferien. Då er det berre til å vera trufast mot dei strikketøya eg alt har begynt på, så det vert noko ferdig å visa fram.

G o d h e l g !

Med ynskje om ei strålande flott helg til deg som er innom!

På pinnane #2

Eg tykkjer eg strikkar og strikkar og strikkar døgnet rundt, men ingenting vert ferdig. Difor vert det eit dette-er-på-pinnane-no-innlegg, for å få litt nytt her.

Det er berre eitt par i sokkegåvekassa mi, så det må eg gjera noko med. Det er jo snart jul. Lilla sokkar i Perfect og grå- og kvitstripete i Hifa fjord sokkegarn 2. Sistnemnde er eit heilt fantastisk sokkegarn, min absolutte favoritt saman med Mor Aase raggegarn. 80 % ull og 20 % nylon gjer sokkane slitesterke, og sidan garnet ikkje er superwashbehandla, tovar sokkane seg lett i bruk og vask og vert dermed varmare enn sokkar i dei typiske sokkagarna, som for eksempel Perfect.

Babyteppe, strikka frå hjørne til hjørne. Legg opp tre maskar og auk ein maske i starten av kvar pinne til du er lei/halvveges tom for garn/teppet er halvparten av stort nok, strikk to maskar saman i starten av kvar pinne til du sit att med tre, fell av og teppet er ferdig. Eg er litt over halvveges og planen er ein påstrikka blondekant rundt til slutt. Strikka i DSA hverdags, eit garn eg definitivt skal strikka meir med.

Regnboge-/stripejakke i New Zealand lammeull. Mønsteret er Kragejakke i dobbelt 2-trådsgarn frå Strikk til nøstebarn. Eg er ferdig med bolen og held på med å mota meg opp til ermestrikk. Eg får alltid sånne merker i overgangane mellom kvar strømpepinne når eg strikkar ermer og det er både stygt og irriterande for eit petimeter. Eg har prøvd 30 cm rundpinne, men det vert for smått og knotete. Kanskje du har nokre gode tips til korleis eg kan unngå det?

Jippi …

… meir som er ferdigstrikka! Eg er faktisk ferdig med heile tre UFO-ar. Først ut er ei jakke som passar godt denne veka.

Ser du uglene?

Faktaboks:

Oppskrift: Jakke og lue med ugler, Sandnes Mix 0910 Barn. Eit bra hefte med mykje fint i.
Størrelse: strikka etter 12 mnd.
Garn: Rauma babyull. Min absolutte favoritt blant alle babyulltypane.
Forbruk: 150 gram, med fem knappar.
Pinnestorleik: 2,5 mm på ribbekantane og knappestolpane, 3 mm på resten av jakka.

Jakka vart fin, fargen er knall og ho varmar nok godt, men eg er ikkje heilt fornøgd med knappestolpane. Kantane nederst trekk seg opp, men etter å ha plukka opp og strikka på nytt fleire gonger, gadd eg ikkje meir, så då får det vera som det vart. Neste gong skal eg strikka rettstrikk over uglene også, ikkje rillestrikk som det står i oppskrifta.

Dei to siste prosjekta er bukser.

Den lysaste er ein skikkeleg årgangs-UFO, påbegynt i mai 2010 (takk til Ravelry for system i sysakene). Den mørkebrune er ikkje fullt så gammal, men all strikkinga att og fram var verkeleg seig. Neste gong vert det glattstrikk rundt, sjølv om rillestrikk sikkert er veldig tøyeleg.

Faktaboks lys bukse:

Oppskrift: frå Sandnes alpakka 0808 0-4 år.
Størrelse: 1-3 mnd.
Garn: Sandnes mini alpakka. Varmt og mjuuuukt. Eg vil også ha ei sånn bukse!
Forbruk: 122 gram, med to knappar.
Pinnestorleik: 2,5 mm på ribbekantane, 3 mm på resten.

Faktaboks mørk bukse:

Oppskrift: Bukse med seler frå boka Myk Start.
Størrelse: strikka etter 0-3 mnd, men buksa er jo dobbelt så stor som den lyse, så det er nok meir 12 mnd.
Garn: Gjestal babyull. Eit heilt greit garn, mykje rimelegare enn dei “typiske” babyullmerka, som Dale, Sandnes og Rauma, men eit elendig fargeutval. 
Forbruk: 180 gram, med to knappar.
Pinnestorleik: 3 mm.

Både buksene og jakka fekk like knappar, fine kokosknappar bestilt frå det store utland.

God påske til deg som er innom!