onsdag 19. august 2015

Mjuk gåve


Ei venninne ventar ein liten gut i september, så då har eg sjølvsagt strikka ein liten haug som vart gitt i gåve i babyshoweren.
Ho ønskte seg praktiske og fine klede, så då gjekk eg for ei blanding av praktiske klassikarar og fine nykommarar.


Den sjøgrøne jakka til venstre er rillejakka frå heftet "Babystrikk på pinde 3" av Lene Holme Samsøe. Sidan eg strikkar laust gjekk eg for Isager højlandsgarn, som er eit tynt garn av 100 % lammeull. Det gjekk med kun 76 gram og resultatet vart ei tynn og lett, men veldig varm jakke. Det er tredje gong eg strikkar denne jakka, men eg er framleis ikkje lei av oppskrifta. 

Den blå jakka i midten er snoningstrøje. Nok ei favorittoppskrift som er overraskande enkel å strikka. Garnet er Drops cotton merino, eit nytt bekjentskap som seglar rett inn på topplista. Det gjekk med 144 gram i den minste størrelsen. 

Vesten til høgre er frå "Strikk til nøstebarn". Ikkje så kjekk å strikka og montera, men ein liten vest er alltid praktisk og denne veks med ungen, så då vart det ein likevel. Vesten er strikka i Drops alpaca og det gjekk med 52 gram. 


Buksa til venstre er Paelas si omslagsbukse. Denne vart strikka på grunn av den artige konstruksjonen, men om ho er praktisk i bruk veit eg ikkje. Garnet er Rauma Tumi, nok eit nytt bekjentskap som også seglar inn på topplista. Lista over favorittgarn har visst vorte ganske lang, men det er jo berre kjekt å ha mange favorittar å velgja mellom. Det gjekk med 96 gram i den minste størrelsen. 

Buksa i midten er frå "Strikk til nøstebarn", ei god bok dersom du ønskjer enkle og praktiske basisplagg som veks med ungen. Føtene kan brettast opp og ned etter behov og ribbestrikken gjer at buksa passar i breidda i lang tid. Garnet er drops alpaca og det gjekk med 94 gram. Til vest og laaang bukse held det altså med tre nøster av dette garnet. 

I tillegg kan babyen varma seg med to par sokkar av typen stay on baby booties, som eg har skjønt er dei beste babysokkane, eit smetteskjerf, ei pilothue frå Klompelompe, ei pixiehue frå Paelas og ein fletteromper frå Tiddelibom. 


Med einsfarga plagg er det lett å miksa og matcha og ein kan få mange ulike antrekk ut av få plagg. 

Då er det berre til å få pinnane i gir og fylla opp att gåvekorga. 

tirsdag 14. juli 2015

Ein enkel vinnar

Den store guttestrikkeboka av Charlott Pettersen er absolutt ei av favorittstrikkebøkene mine. Oppskriftene viser verkeleg at det enkle ofte er det beste. Fleire av plagga er enkle i form og fasong, men akkurat denne enkelheiten gjer det stilfullt og lett å kombinera dei ulike plagga. Alt etter kva garn og farge ein vel, kan ein variera den same oppskrifta i det uendelege og få ulike uttrykk på dei ferdige plagga.


Shortsen har eg strikka fleire av før, men 70-talsjakka var ny på pinnane. Jakka er ei enkel jakke med raglanfelling og vrangborder. Ein kan også velja rillestrikk på bordene, men eg valde ribbestrikk for best passform. 


Jakka er i strikka i Sandnes Duo og det gjekk med 156 gram i størrelse 1 år, som er den minste størrelsen. Eg strikka eit par centimeter ekstra på bol og ermer, så viss ein føl oppskrifta slavisk held det nok med tre nøster. Kantane er strikka med pinne 3 og resten av jakka med pinne 3,5. Resultatet vert ei lett og passe tjukk jakke som eg vil tru passar perfekt til alle anledningar året rundt.


Shortsen er strikka i Sandes alpakka. Det gjekk med 82 gram i størrelse 1 år. Eg har gjort litt endringar frå oppskrifta, på same måte som eg gjorde på den rosa shortsen i dette innlegget. Sidan eg tykkjer det er finare med ein rett modell enn ein posete, droppa eg aukingane etter vrangborda i livet. Sidan eg ikkje auka slik som i oppskrifta, hadde eg heller ikkje så mange masker til kvart bein og eg felte derfor ingen masker før eg strikka vrangbordene rundt beinopningane.

Snora i livet er strikka på gamlemåten, sidan strikkemølla mi ikkje vart med på sommarferie. For å få ei tynn, tett og stødig snor brukte eg pinne nummer 2.


For det vetle ekstra fekk jakka seg eit heimalaga-merke i nakken.


Eg tykkjer det glatte og godt definerte ull- og bomullsgarnet i jakka passar perfekt saman med det hårete, tweedfarga alpakkagarnet i shortsen. Altså eit sett eg er strålande fornøgd med og som lett seglar inn på lista over det finaste eg har strikka, sjølv om det er så enkelt.

søndag 12. juli 2015

Strikking på Instagram #4

Her kjem ei ladning med strikkebileter frå Instagram.

To plagg som treng knappar. Det er alltid lika vanskeleg å velgja knappar, sjølv om utvalet i heimen er stort.














Eg har aldri vore ei rosajente, men eg har visst litt rosa garn likevel.
















Brunt og beige er eg derimot veldig glad i. Det, saman med grått, passar til alt.
















Mammaen til vetle fadderjenta mi bestilte ei hua (den rosa med kvitt mønster), men éi vart visst til tre før eg rakk å tenka meg om.















Starten på ein hjertecardigan. Denne vart ti nummer for stor (merkeleg oppskrift), så eg rakk opp att alt og noterer meg færre maskar under ermene til neste gong.














Eg gjekk på ein garnsmell under dropssalet i mai, men eg var fornuftig og kjøpte kun garn eg veit at eg lett får brukt. Fleire av nøstene er allereie oppstrikka.













tirsdag 7. juli 2015

Siste skrik

Kortbukser og drakter av alle slag er på strikkemoten no (iallfall er det veldig populært på Instagram), så då måtte eg jo få nokre av sorten på mine pinnar også.


Den stripete shortsen er strikka etter ei oppskrift frå "Den store guttestrikkeboka". Sjølv om tittelen seier at boka inneheld oppskrifter til gutar, tykkjer eg oppskriftene passar like godt til jenter også. Sidan eg ikkje ville ha ein så posete shorts som i oppskrifta, droppa eg aukingane etter vrangborda i livet. Vidare har eg lest at hola til beina vert trange dersom ein feller som i oppskrifta, så eg felte færre masker før eg strikka vrangbord.

Garnet eg har brukt er Lille lerke frå Dalegarn. Dette er eit av mine favorittgarn, sidan det er så mjukt og godt å strikka med. Blandinga av ull og bomull er også veldig praktisk. Akkurat kor mykje som gjekk med av kvar farge (kvit og lyserosa) veit eg ikkje, men shortsen veg 80 gram til saman.


Den rosa romperen er strikka etter oppskrifta "hullmønstret romper" frå Tiddelibom. Det har dukka opp mange flinke norske designarar dei siste åra og denne dama har veldig mange fine oppskrifter. Hittil har eg berre strikka flettet romper og hullmønstret romper, men begge oppskriftene er godt og enkelt forklart og veldig greie å strikka. 

Garnet eg har brukt til denne er Drops cotton merino. Også eit av favorittgarna mine og litt meir studentlommebokvenleg, spesielt når det er kjøpt på Drops sitt maisal. Det gjekk med 114 gram på pinne nummer 3 og 3,5. Eg strikka den største størrelsen, 1 år, men eg trur nok drakta vart litt større. 


I-cordsnor, perlestrikka selar og fine treknappar er små detaljar som gir plagga det vetle ekstra, tykkjer eg. 

søndag 21. juni 2015

Islænder

Etter å ha sett så mange fine utgåver av denne gensaren på Instagram måtte eg få ein på mine pinnar også. Gensaren har vore planlagt lenge, men som kjent tek ting tid. Planen var å strikka med totrådsull av type NZ lammeull eller Shetland soft, for å få ein lett og varm gensar, men eg hadde ikkje nok av dei rette fargane. Eg kjøpte derfor inn Karisma under Drops sitt garnsal no i mai. Det er nok like greit at det vart Karisma, så kan gensaren vaskast i maskin.


Mønsterstrikk er ikkje mi sterkaste side, men som med alt anna gjer vel øving meister. Biletet over viser ein veldig bulkete bol. Erma var endå verre, sidan dei vart strikka på ermepinnar, men ein vask i maskina gjorde verkeleg underverk. Mønsterstrikken jamna seg ut og gensaren vart lett og god.


Oppskrifta er islænder frå heftet "Knit for your kid" av Susie Haumann. Dansk strikkedesign er verkeleg noko for seg sjølv. Gensaren er strikka i størrelse 2 år, som er minste størrelse i oppskrifta. Eg har lest fleire plassar at modellen er kort og vid, så eg la til ekstra lengde på både bol og ermer. Det gjorde eg ved å strikka fleire mønsterrepetisjonar enn oppskrifta seier før ein deler av. Eg tok eit lengdemål eg fann i ei gensaroppskrift i omtrent same garntjukkelse frå "Strikk til nøstebarn". På augemål trur eg resultatet vart bra med tanke på proporsjonar, men størrelsen er nok nærare 3 år enn 2.


Garnet er som skreve Drops Karisma. Det gjekk med nesten to nøster av mønsterfargen (lyseblå) og nesten fire nøster av botnfargen (beige/sand). Eg strikka med pinne 3,5, sidan eg strikkar laust.


Gensaren kan strikkast i mange fargekombinasjonar og eg kjenner at eg absolutt må strikka ein til i heilt andre fargar. Men først må eg gjera ferdig ein liten haug med UFOar som ligg i strikkekorga og ventar.

torsdag 18. juni 2015

Resterilleteppe

Då er det endeleg sommarferie og forhåpentlegvis vert det også betre tid til blogging. I vinter- og påskeferien og etter at eg kom heim til opphavet før helga, har eg kun strikka på ein gammal UFO og no er den endeleg ferdig.


UFOen er eit rillestrikka teppe, sterkt inspirert av ei oppskrift frå Arne og Carlos si bok "Håndarbeid i hagen". Etter å ha sett teppet på andre sine bloggar, blant anna her hjå To vrange og her hjå Tusenfryd, fekk eg lyst til å strikka eit slikt sjølv.


Eg brukte diverse restar av Shetland soft frå Malsen og mor og New Zealand lammeull frå 123knit.com. For å få litt fortgang på sakene strikka eg med dobbel tråd på pinne nummer 6.


Fargane er bestemt (ganske) tilfeldig og eg strikka til kvart nøste var oppbrukt. Sjarmen med resterilletepper er at dei ikkje alltid vert så lekre. ;-)


Det gjekk med 1116 gram (etter trådfesting) og teppet måler omtrent 120 x 220 cm. Eit lett, luftig og stort teppe som passar perfekt til å pakka seg inn i ein kald haust- og vinterdag.


Sidan teppet luktar litt (spinnolje i Shetland soft), trur eg at det skal få seg eit milobad. Spørsmålet er berre om eg skal ta sjansen på ullvask i vaskemaskina, eller om eg skal gå for handvask i badekaret. 

lørdag 21. februar 2015

På pinnane

Litt nytt frå pinnane mine:


Det oransje er eit skjerf, strikka i Tulliball. Eg gjekk tom for garn nokre omganger før felling, så eg må ta meg ein tur på butikken og sjå om eg finn noko som liknar i både farge og kvalitet. 

Det gule er starten på ein sokk, men eg lurer på om eg skal rekka opp og bruka garnet til noko anna. Eg er liksom ikkje heilt i sokkestrikkehumør for tida. 

Det rosa og kvite er ein hals til juleflyinnsamlinga. Lagerslankinga går veldig bra og restane vert strikka opp bit for bit. Det er fint å sjå at garnet eg helst vil gi vekk kan verta til noko varmt og nyttig til nokon som ikkje har så mykje. Planen er fire halsar og fire huer til dei fire vottapara frå førre innlegg. 

Kommande veke er det studieveke/vinterferie, så forhåpentlegvis vert det mykje ferdigstrikka og mange plagg å blogga om.

lørdag 14. februar 2015

Restegarnsstrikk #2

Eg held fram med lagerslankinga mi, sjølv om det ikkje går så fort nedover. Det første eg vil verta kvitt er alt restegarnet. Eg grov derfor fram diverste restar og enkle nøster av Finull og PT2.


Eit kjapt og enkelt prosjekt er dei rillestrikka vottane frå Strikk til nøstebarn. Med dobbelt garn og relativt tjukke pinnar går det fort å strikka ein liten vott. Det vart fire par før eg var lei av vottestrikking. Desse har eg tenkt å senda til juleflyinnsamlinga, som du kan lesa meir om her.


Finull og PT2 er litt tjukkare enn Nøstebarn sitt totrådsgarn, som er brukt i oppskrifta, så vottane vart nok litt større enn 3-5 år. Men, men. Tjukke, varme vottar i rein ull er godt å ha uansett kor gammal ein er.


Då er det berre ein nesten full plastkasse med restegarn att. Sukk.

lørdag 7. februar 2015

Brunbjørn

Endå litt meir småstrikk er ferdig. Eller, det har vore ferdig ei god stund, men alt det andre tek visst veldig lang tid.


Ein vest, ei hue og ei bukse, alt i nyansar av brunt med like treknappar. Vesten er frå Strikk til nøstebarn, strikka i Drops sitt alpakkagarn. Buksa er onkel Malsens kosebukse, strikka i Shetland soft. Hua er pilotlue frå Klompelompe, strikka i Sandnes merinoull.

Alle tre oppskriftene er nye favorittar. Så enkle å strikka og så gode og praktiske i bruk (vil eg tru, då).

søndag 18. januar 2015

Strikking på Instagram #3

Sidan eg ikkje har blogga i haust, kan eg leggja ut strikkebileta frå Instagram.

Ei brun bukse til ein liten kar. Onkel Malsens kosebukse, strikka i Shetland Soft.

















Ein perlestrikka tubehals til meg sjølv. Til denne grov eg djupt i garnskuffa og fann to nøster med Rowan felted tweed som eg kjøpte då Knappehuset hadde opphøyrssal. Skikkeleg årgangsgarn, altså.














Bella til fadderjenta mi. Strikka i Shetland soft. Absolutt ikkje siste gongen eg strikkar denne. Eg tykkjer bladmønsteret er så fint!
















Gjekk på ein garnsmell etter den første eksamen i desember. Sånn kan det gå når allereie billig Dropsgarn er på sal.
















Julegåvevottar. Mønsteret er Pearl chain mittens, funne på Ravelry. Også desse er strikka i Shetland soft. Eg har visst strikka mykje med dette garnet i haust.















Litt småstrikk til ein søt liten gut. Lettstrikka hue og smetteskjerf frå Strikk til nøstebarn, strikka i babyull.
















Viktig å pakka nok garn til tre veker juleferie. At kun to av nøstene vart brukt er ikkje så viktig. ;-)

















Denne er ikkje strikka i haust, men eg er så stolt at den fortener litt plass likevel. Marius til vetlesøster, strikka i Falk (som visstnok klør). Den neste får verta i babyull, trur eg.