Sokkestrikk

Sokkar passar perfekt som innimellomstrikk i travle tider, sidan det er eit spøt eg enkelt kan legga frå meg og ta opp att, uansett kor langt eg har komme. Sjølv om det nokre gonger går sakte framover, vert ein omgang her og ein omgang der alltid til to ferdige sokkar.



Dette paret er strikka i løpet av november og desember. Travle månadar, men då er det godt å ha eit strikketøy å halda fast i mellom slaga.



Eit heilt enkelt, ribbestrikka par med langt bråt. Garnet er Robust og eg har brukt pinne nummer tre og 48 masker, som vanleg. Sokkane skal rett i gåvepapiret og så hamnar dei under eit juletre om åtte dagar. Forhåpentlegvis kan dei varma to føter i mange kalde vintrar framover.

På pinnane

I det siste har eg faktisk vorte veldig flink til å strikka ferdig det eg legg opp til, men litt halvferdig vert det visst alltid. Akkurat no held eg på med to prosjekt, i tillegg til at eg har plukka fram ein gammel UFO.

Gule sokkar. Desse trur eg vert bursdagsgåve til ei venninne. Sterk og det velkjende blueberry waffle-mønsteret på pinne nummer 3. 

Raud hue (ufoen). Pappa bestilte ei hue som skulle vera lik Ola Braanas si. Hverdags på pinne nummer 3, strikka etter bilete funne på Google.

Brune vottar. Dette er eit av mønstera i vottealongen på Uformelt. Planen er at desse skal i gåvekassa. Dobbel tråd finull på pinne nummer 5,5, mønsteret er Martine flettevotter.

Desse tre prosjekta burde vera enkle og kjappe å få ferdige.

Fort gjort

Det eg hadde planlagt å få gjort i helga gjekk unna på nokre timar.

Den blå jakka mangla samansying i eine sida og knappar. Jakka er rilletrøje frå heftet Babystrik på pinde 3, strikka i New Zealand lammeull. Den kvite vesten, babyundertrøye frå Strikk til nøstebarn, mangla samansying i sidene og knappar. Også denne er strikka i New Zealand lammeull. Hua mangla snorer (som mamma hekla for meg, mange takker). Oppskrifta her er lettstrikka babylue frå Strikk til nøstebarn. Garnet er Shetland soft frå Malsen og mor.

Dei to huene mangla trådfesting, same med dei tre sokkepara. Huene er strikka i veldig gammalt lagergarn og skal sendast til To vrange og hennar juleflyinnsamlingsaksjon. Sokkane er strikka i restegarn og skal rett i gåvekassa, som sårt treng påfyll.

Då var korga tom. Men eg har fylt ho opp att med tre nye prosjekt som berre manglar litt småplukk for å verta ferdig. Planen er at det skal eg få gjort i løpet av veka.

Påfyll

Sokkar er liksom min ting. Då strikkinga vart ein hobby for omtrent seks år sidan, var det sokkar eg starta med. I løpet av åra har det vorte så mange par at eg mista teljinga ein gong i løpet av hausten 2011 (i følge Ravelry), men eg vil tru det er over 200 par. Eg har cirka 10 sjølv, resten har familie og venner fått.

Eg lærte meg heilt enkle ribbestrikka sokkar med mamma sin litt spesielle hæl, men i løpet av åra har eg utvida horisonten. Etter litt rot med veldig avanserte mønstersokkar har eg funne ut at det enkle er ofte det beste når det kjem til familien min. Dei brukar sokkane året rundt, både rett på foten som innesokkar og ute i gummistøvlane. Slitasjen er stor, så eg strikkar og strikkar og strikkar. Bursdagar og jul betyr alltid innhogg i kassa med ferdige sokkar, så no var det på tide å fylla på att.

Seks par fekk eg ferdig før eg fekk lyst til å strikka noko anna.

Gult par = Perfect.
Rosa par = Regia silk, 6-tråds.
Kvitt par = Sterk.
Turkis par = Sterk.
Grått par = Sterk.
Gråblåmelert par = dobbel tråd Fabel.

Eg held på med garnslanking, så eg prøver hardt å bruka av sokkegarnlageret mitt. Etter alle desse sokkane har det minka, men eg har nok til minst tre par endå + restegarn til sikkert like mange.

På pinnane

I år har eg bestemt meg for å ikkje ha så mange prosjekt på pinnane samtidig. Difor har eg gjort ferdig ein del UFOar, eg har funne ein liten haug eg skal rekkja opp og eg har vore veldig flink til å strikka ferdig det eg har lagt opp til sidan juleferien.

Hovudprosjektet mitt akkurat no er huer til SAS sitt julefly. Det kan du lesa meir om her.

I tilegg til det over har eg også bestemt meg for å slanka garnlageret i år. Først ut er alpakkalageret. Dei siste åra har eg mista litt sansen for rein alpakka. Eg likar mykje betre ull/alpakkablandingar, så då fann eg ut at alpakkahaugen er fin å starta med. Eg har to-tre nøster i mange ulike fargar, altså passar lageret best til småplagg. For å få litt fart på slankinga brukar eg to trådar saman. På desse fire huene har eg brukt ein tråd Sandnes alpakka og ein tråd DSA tynn alpakka. Resultatet vert tjukke og varme huer, perfekt i eit veldig kaldt vinterland.

Eg har også eit par med sokkar på pinnane. Planen er som sagt å berre ha eitt prosjekt gåande, men på veg til eit besøk før helga kom eg på at eg ikkje hadde pakka med meg huestrikketøyet. Då måtte eg innom strikkebutikken og kjøpa garn og pinnar. Sokkar er det alltid bruk for i familien, så då vart det eit fornuftig val trass i både garnslanking og eittprosjektplanen.

Sokkane reknar eg med å få ferdig i kveld. Eg har att eitt nøste DSA tynn alpakka, to nøster Hverdags og fem nøster Sandnes alpakka, så det vert fleire huer før haugen er tom.

Pausestrikk

Medan eg ventar på at strikke- og bloggelysta skal komma tilbake, har eg strikka litt sokkar. Det er enkel strikking som ikkje krev så mykje konsentrasjon eller innsats - altså det perfekte innimellomspøt. Gåvekassa treng alltid påfyll av sokkar også.

Frå februar og ut april vart desse para strikka. 11 par, men fem er allereie gitt vekk i bursdagsgåver.

Garna eg har brukt er Viking alpaca sport (grusomt!), Perfect (fekk tømt lageret for den sorten), Sterk, Regia 6-tråds (fantastisk godt!), Hot socks cuba og Järbo mellanraggi.

Den siste tida har eg strikka ferdig to nye par + tre enkle sokkar som manglar make. Planen for sommaren er at eg skal verta ferdig med julegåvesokkane. Etter ein rask oppteljing i gåvekassa har eg snart 12 ferdige par, så eg er på god veg.

På pinnane

Januar var ein veldig produktiv månad, men i februar har eg ikkje fått strikka så veldig mykje. Men litt har det no vorte, sjølv om ingenting er ferdig.

Sokkar til gåvekassa. Kassa er tom no etter jul og med bursdagshøgsesong i familien det neste halve året, må eg fylla på. Garnet er Regia 6-tråds. Eit veldig godt garn å strikka med, men eg gløymer stadig vekk at eg eigentleg tykkjer klovnespygarn er grusomt stygt. Derfor held eg på med eit evig slankeprosjekt av spraglegarnlageret mitt.

Rillestrikka tovavottar. Besta fekk eit par med lilla til jul og andre juledag ringde onkel og lurte på om eg kunne strikka eit par til han også. Han hadde prøvd besta sine og det var dei beste vottane han hadde hatt på seg i sitt liv. Slikt varmar eit strikkehjarte, så sjølvsagt la eg opp til vottar. Han sa at det ikkje hasta med å få dei ferdig, men no er jo vottesesongen snart over, så eg bør få pinnane i gir.

Mariusgensar til vetlesøster. Ho har ønskt seg marius i fleire år, så eg fann ut at no måtte ho få ein. Garn og lovnad om ferdig gensar vart julegåva hennar i fjor. Strikkinga gjekk radig fram til eg skulle til på mønsteret. Då måtte eg mota meg opp i eit par veker. Då eg var klar og begynte, gjekk mønsteret unna også, men så mista eg ned ti masker og saman med dei forsvann piffen heilt. No trur eg søster tykkjer at ting tek tid her, så planen er å få gensaren ferdig til påske.

Rillestrikka lappar til tepper. På bloggen til Bea såg eg at ho strikka lappar til Ull&Omtanke. Eg tykte dette såg ut som eit knakande flott prosjekt og heiv meg med. Så enkle og små lappar er jo strikka på 10 minutt, så dette er noko alle kan klara. Eg har funne fram posen med restegarn og strikkar ein lapp no og då. Planen er å strikka lappar fram til påske og så senda haugen avgårde då.

Dette var dei prosjekta som er på pinnane akkurat no. Haugen med UFOar som ligg i skapet og skrik er eit anna kapittel.

Årskavalkade

Det vart ikkje blogga så mykje i fjor, for lysta var ikkje heilt på topp. Likevel strikka eg ganske mykje. Problemet er at eg har vore usannsynleg dårleg til å ta bilete, så det er berre ein brøkdel av alt som er dokumentert og registert på Ravelry. I tillegg har eg starta på veldig mange nye prosjekt i 2012 som eg ikkje har gjort ferdig og såleis ikkje har bilete av.

Men noko har eg å visa fram:

Det eg er aller mest fornøgd med av alt eg laga i fjor, er definitivt hekleteppet eg endeleg fekk ferdig. Det var ein skikkeleg seig årgangsUFO. Elles går det stort sett i det same som tidlegare år – sokkar, barneklede, vottar, sjal og kjøkenklutar. Nytt av fjoråret er faktisk vaksengensarar (som eg rett nok måtte rekkja opp), men det vert så absolutt fleire i 2013.

Eg har også store planar om å føra betre oversikt over alt eg strikkar, slik at eg kan laga ein like fancy årskavalkade som Monstermønster.

Sokk på sokk på sokk på sokk

Lang tid, ingen innlegg. Ingen forklaring på kvifor, det har berre vorte sånn.

Men eg har strikka i sommar. Sokkar, etter planen.

Dei beige, blåturkise og brune er strikka i Sterk på pinne 2,5. Tidlegare har eg alltid strikka med pinne nummer 3 til det garnet, men etter at eg fekk ein kommentar om at det eine paret eg har strikka med 2,5 tidlegare og gitt vekk, er det beste sokkeparet eigaren har, har eg gått over til 2,5. Det tek litt lenger tid å få sokkane ferdig, men resultatet er verdt det! Solide, stødige sokkar og nøgd mottakar. Til sokkar i størrelse 43isj med lang vrangbord held det med to nøster, så garnet er drygt i bruk.

Det lilla paret er strikka i Perfect på pinne nummer 3. Sidan eg ikkje er så begeistra for dette garnet meir, prøver eg å strikka opp Perfectlageret mitt. Etter denne sommaren ser eg verkeleg ein ende på det.

Elles på strikkefronten har eg begynt på haust- og vintergarderoben til meg sjølv! Er det ikkje typisk at når ein burde bruka tida på å strikka julegåver, så dukkar det opp side på side med plagg eg fell pladask for?

Vel, kanskje eg må fira litt på krava og gå for kjøpte gåver i år. I kveld vert det uansett egostrikk i sofakroken, for ute høljar det ned.

Ha ein fabelaktig laurdagskveld, du som er innom!

Sokkestim

Sokkestrikkelysta var tilbake for ei stund sidan, så no har eg endeleg noko ferdigstrikka eg kan blogga om.

Først fekk eg gjort ferdig tre par med UFO-ar, så rakk eg to nye par før lysta forsvann like fort som ho kom.

Det aller beste er at eg fekk brukt opp noko av det sjølvstripande sokkegarnet mitt - faktisk tre store nøster. Eg tykkjer sokkar av slikt garn vert ufordrageleg stygge, men likevel renn det inn nøste på nøste. Det kan kanskje ha noko med at eg får hjartebank kvar gong eg ser eit slikt nøste i butikken. Dess fleire fargar på nøstet, dess betre. Men så gløymer eg at det vert hesleg oppstrikka. Ja, ja.

Alle sokkane er strikka på pinne nummer 3, 48 masker. Tre av para i blåbærvaffelmønster, dei andre to i glattstrikk.

I tillegg fekk eg det for meg at eg skulle rydda i sokkegarnet mitt, for å lettare finna fram i mengdene.

No ligg alt i plastkassar, sortert etter tjukkelse, merka med tynt/mellomtynt/mellomtjukt/tjukt/restar og pinnestørrelse for dei ulike gruppene utanpå kassen. Planen er at innholdet i fire av seks kassar skal slankast vekk. Eg må jo ha litt sokkegarn på lager, så mykje sokkar som eg strikkar, men det fins jo grenser for alt.

Statusrapport Socktober

Me er over halvveges i månaden, så då er det verkeleg på tide med ei sokkeoppdatering.

Månaden begynte bra. Pinnane gjekk så det suste og par etter par (alt er relativt) vart påbegynte/ferdige. Litt etter litt dabba sokkestrikkelysta av og no er ho heilt vekke. Typisk rett før jul. Til gjengjeld er eg inne i ein god UFO-stim, noko som er høgst uvanleg, så eg bør vel ikkje klaga for høgt. Til no har eg fått ferdig to store og snart ein litt mindre.

Vel, over til sokkane. Først ferdig var konkurransesokkane.

Mønster: frå Bittami. Første sokk i Norsk sokkedilla.
Garn: Sisu frå Sandnes. Det gjekk med rett under to nøster.
Pinne: 2,5 mm.
Størrelse: ein plass mellom 39 og 40.

Neste par er SKA-sokkane for september.

Mønster: Nell. Det ligg som gratismønster på Ravelry. Greit mønster, men det vart liksom litt for holete til å vera sokkar.
Garn: PT5. Det gjekk med litt over to nøster.
Pinne: 2,5 mm. Ja, eg har sett lyset.
Størrelse: 39-40isj.

Fleire ferdige par har eg ikkje, men eg har ein haug med påbegynte.

Alle fem para manglar litt forskjellig, frå berre trådfesting til heile sokk nummer to.

God helg til deg som er innom!

Septemberstrikk

Det har vore lite strikkerelatert blogging i det siste, men pinnane får køyrt seg likevel. Akkurat no er eg inne i ein sokkestrikkeperiode. Mykje av grunnen til det er at eg har meldt meg inn i to grupper på Ravelry – SolidSocks og Sock Knitters Anonymous. I SolidSocks skal ein strikka sokkar i éin bestemt farge for kvar månad. September var raud. I SKA er det ulike utfordringar og designarar kvar måned, så kan ein velja det ein vil. I september valde eg designar, sidan eg ikkje hadde garn som passa til utfordringa (chartreuse). Det fine med SKA er at ein berre treng å leggja opp til sokken i løpet av månaden, ein har heilt til den siste dagen i neste månad til å strikka ferdig. Perfekt, sidan eg ofte strikkar på litt fleire enn ein ting om gongen.

I tillegg har eg meldt meg på DUSS inne på Uformelt. Det starta i januar, men eg fekk ikkje somla meg til å melda meg på før ni månadar seinare, så eg har altså åtte par som eg må ta att. Travelt, sa du?

Først ut er Hermine sine kvardagssokkar, mine septembersokkar i SolidSocks. Enkelt og greit mønster, men likevel vert det fine sokkar. Eg har brukt PT5 og pinne nummer 2,5. Det gjekk med litt meir enn to nøster til størrelse brei fot 40. Vanlegvis har eg brukt pinne nummer 3 når eg strikkar med PT5, men jammen vart det ikkje endå betre med 2,5. Då får det heller vera at det går med litt meir garn enn det gjorde før.

DUSS-sokkane for september var Carolina, eit supert mønster som passar perfekt til fleirfarga garn. Dei rosa nøstene mine med vellagra Fabel skreik etter å bli brukt. Litt mindre enn to nøster til størrelse 40, pinne nummer 2,5. Trur dette er mitt nye favorittmønster til spraglete garn – stilig, men samstundes veldig enkelt å hugsa. Perfekt til tv-strikk.

Eg har også meldt meg på Norsk sokkedille. Det er ein sokkestrikkekonkurranse med norske mønster designa av superflinke strikkedamer. Første sokk ut er laga av Bittami. Eg storkosar meg med mønsteret og nistrikkar for å bli ferdig fortast mogleg.

Sokkane i SKA treng heldigvis ikkje å vera ferdige før 31. oktober, så dei får kvila litt medan eg gjer meg ferdig med konkurransesokkane.

I morgon er det oktober, så då skal eg strikka lilla sokkar, DUSS-sokkar for oktober og helst eit par månadar til, sidan eg heng litt etter, SKA-sokkar for september og oktober og forhåpentlegvis fleire konkurransesokkar. Vel, vel. Me snakkast etter jul, folkens.

God helg, med eller utan strikketøyet!

Nye kunstar

På grunn av den %!&#@ ryggen har eg god tid til å strikka fram til jul og då må eg jo bruka tida fornuftig. Fornuftig = sjølvutvikling = læra seg nye, avanserte ting. Først ut på lista var sokkar strikka frå tåa og opp - altså motsett veg av sånn som eg pleier å strikka.

Det første problemet eg møtte på var tåa. Bra start. Eg fekk ikkje til nokon av dei oppskriftene eg fann på nettet, så til slutt lagde eg mi eiga tå, faktisk. Eg gjorde motsett av slik eg pleier når eg strikkar den vanlege vegen. Dvs at eg la opp det talet masker eg pleier å sitja att med til slutt og auka i den takta eg vanlegvis feller. Vips, så hadde eg ei fin-fin tå.

Då var det berre rein plankekøyring fram til hælen. Heller ikkje der skjønte eg nokon av oppskriftene frå nettet. Alle hadde jo så alvorleg mange fleire masker enn det eg hadde på pinnane, og ikkje fekk eg til å endra på oppskriftene så dei passa til masketalet mitt heller. Men så kom eg over denne fantastiske oppskrifta. Med berre fire masker meir enn eg hadde gjekk det supert.

Etter hælen var det ribbestrikk (tre rett, ein vrang) i fleire meter før eg kunne fella av. Avfellinga skulle visa seg å vera eit lite problem også, for då eg felte av slik som eg vanlegvis gjer, så vart det altfor stramt og sokken gjekk ikkje over foten. Ut på leit på nettet igjen og eg kom over Jeny’s surprisingly stretchy bind-off. Og jammen vart eg overraska, du! Makan til avfelling har eg aldri prøvd før. Anbefalast på det varmaste til alt som ikkje bør vera for stramt (f.eks genserermer).

Sokk nummer to gjekk mykje lettare og før eg visste ordet av det (sånn omtrent to dagar seinare) hadde eg eit par.

Eg er overraska over kor lett det faktisk var. Dessutan er tå-opp ein perfekt måte å få brukt opp absolutt alt garnet utan å måtta tenkja på om ein går tom før tåa er ferdig. Som ein siste bonus, så tykkjer eg faktisk at det tok mykje kortare tid å strikka ferdig eit par denne vegen.

Det einaste eg er litt usikker på er passformen. Heng tå-opp sokkar like godt fast som sokkar strikka den vanlege vegen, eller sig dei meir på grunn av den lause avfellinga?