Meir smått

Eg fekk to nøster med det mjukaste garnet til bursdagen min. Garnet var tiltenkt premturstrikk, så eg kasta meg rundt og la opp same helga. Saman med to nøster frå lageret og eitt frå garnbutikken vart det til to små tepper.

Oppskrifta er den same som sist – tre masker, auk kvar omgang til A3-størrelse, fell kvar omgang til tre masker. Denne gongen hekla eg ein bølgekant rundt med kontrastfarge, noko eg er veldig fornøgd med! Teppa vart med eitt litt finare og stødigare. Det gjekk med to nøster Drops merino extra fine til kvart teppe + eitt nøste av kontrastfargen totalt.

Årskavalkade

Det vart ikkje blogga så mykje i fjor, for lysta var ikkje heilt på topp. Likevel strikka eg ganske mykje. Problemet er at eg har vore usannsynleg dårleg til å ta bilete, så det er berre ein brøkdel av alt som er dokumentert og registert på Ravelry. I tillegg har eg starta på veldig mange nye prosjekt i 2012 som eg ikkje har gjort ferdig og såleis ikkje har bilete av.

Men noko har eg å visa fram:

Det eg er aller mest fornøgd med av alt eg laga i fjor, er definitivt hekleteppet eg endeleg fekk ferdig. Det var ein skikkeleg seig årgangsUFO. Elles går det stort sett i det same som tidlegare år – sokkar, barneklede, vottar, sjal og kjøkenklutar. Nytt av fjoråret er faktisk vaksengensarar (som eg rett nok måtte rekkja opp), men det vert så absolutt fleire i 2013.

Eg har også store planar om å føra betre oversikt over alt eg strikkar, slik at eg kan laga ein like fancy årskavalkade som Monstermønster.

Julegåver 2012

I fjor som alle år tidlegare hadde eg store planar for dei strikka julegåvene, men tradisjonen tru gjekk det rett vest jula 2012 også. Tidsskjemaet sprakk og eg rakk berre halvparten. I år, derimot, har eg bestemt meg for å strikka ferdig alle julegåvene før november. Tradisjonen tru. ;-)

(Instagrambilete av julegåveplanlegginga 2012)

Uansett vart det litt mjuke pakkar under juletreet.

Lilla sjal og tova vottar til besta. Sjaloppskrifta er Shaelyn, ei veldig enkel og godt forklart oppskrift. Dette er strikka i Hifa 2, på pinne nummer 4. Eg strikka to slike sjal til, men dei gløymde eg å ta bilete av før eg pakka dei inn. Eitt kvitt i Drops babymerino og eitt beige i Jo Sharp silkroad DK tweed.

Vottane er rillestrikka vottar frå Strikk til nøstebarn. Desse strikkar du på eit par kveldar, sidan det er dobbel tråd og rillestrikk. Passformen er også heilt super! Eg tova vottane litt i vaskemaskina for å få dei tettare og varmare.

Eg hekla også tøflar til ei venninne. Oppskrifta er Babushka ballerinatøfler frå M.I.L.C.H. SCHAUM. Nok ei super oppskrift som var veldig enkel å følgja, sjølv for ein som ikkje har hekla så mykje.

I tillegg strikka eg to par med tova vottar til, eitt par med ribbevottar og ni par med sokkar. Nokre av sokkane har eg vist fram før her, men resten av para gløymde eg også å ta bilete av før eg pakka dei inn.

Dårleg hukommelse kan vera kjekt

Då eg for eit par dagar sidan leitte etter noko i det eine skapet mitt, fann eg plutseleg ein haug med kjøkenklutar stappa godt inn bakerst i den nederste hylla. Litt sjokkert over at eg hadde gløymt desse drog eg fram klut etter klut og til slutt vart det faktisk ein ganske stor stabel.

No skal eg berre festa dei siste trådane og gi dei ein omgang i vaskemaskina, så har eg plutseleg kjøkenklutar nok til ein heil liten restaurant. Kanskje eit par klutar og ein oppvaskkost hadde vore ei fin julegåve?

Jippijei!

E g  e r  f e r d i g  m e d  t e p p e t  !

Under ser de henholdsvis den spede start, som eg blogga om i februar 2009, og neste mellomrunde, som eg blogga om i oktober 2009. Dette er altså ein skikkeleg årgangs-UFO – faktisk trur eg det er det eldste prosjektet eg har hatt liggande.

Under den årlege sommaryddinga av rommet mitt fann eg att kassen med teppet oppi, og eg bestemte meg for at no hadde det verkeleg lege lenge nok til modning. Planen var fleire omgangar, men ikkje hadde eg att garn og ikkje hadde eg lyst til å hekla meir heller, så då sa eg meg fornøgd. Mamma vart kommandert til trådfesting og no er det altså FERDIG!

Størrelsen vart ikkje heilt som planlagd, men eg trur det passar perfekt som treng-litt-varme-på-føtene-medan-ein-sit-i-godstolen-teppe. Dei vitale måla er 115 x 115 cm (ublokka) og det gjekk med 730 gram garn (etter trådfesting). Garnet er ein lett blanding av Safir, Rubin og Østlandsgarn. 

Tre år seinare enn planlagd kan endeleg besta få seg teppe til bursdagen.

Det bomullske tårn i Bergen

Det siste året har eg funne ut at kjøkenklutar er perfekt ventestrikk. Tanketom og enkel strikk der det ikkje gjer noko om ein må gå midt i ein pinne. Det passar fint medan eg ventar på at middagen skal koka ferdig, medan eg ventar på at klokka vert nok til at eg må springa til bana, medan eg ventar på at den berømte sokk nummer to skal verta ferdig og så vidare.

Eg har tydelegvis venta mykje den siste tida, for haugen med klutar har vakse ut over alle støvleskaft, eventuelt ut over all skapplass.

For å få litt variasjon har eg hekla eit par klutar også. Det gir tjukkare og stødigare klutar, men dreg samstundes meir garn.

Eg har brukt to typar bomullsgarn, Paris frå Garnstudio og Petunia frå PT. Paris er tjukkare og gir mindre, men fastare klutar, medan Petunia er tynnare og gir større klutar. Paris er betrakteleg mykje billigare enn Petunia, men så er det jo det med størrelsen også. Eg tykkjer begge garntypane er gode å strikka/hekla med og har ingen favoritt. Det einaste må vera at Paris har eit heilt enormt fargeutval.

I forhold til bruk og vask over tid har eg endå ingen erfaring, sidan klutane er tenkt som gåver litt fram i tid.

Den raude kluten på biletet over er strikka i Petunia. Som ein ser er han mykje større enn dei andre. Den grøne er hekla i Petunia og er mykje mindre enn den raude, men samtidig er han fastare. Den gule kluten er strikka i Paris og det same er den grå, men han er vaska ein gong på 60 grader. Det er ikkje så godt å sjå på biletet, men etter vask vart kluten stødigare og kjennes mykje meir “klutete” ut.

Eg anbefalar klutstrikk/hekling på det varmaste! Det går kjapt, ein får brukt opp heile nøstet, ein får noko nyttig, heimastrikka klutar er mykje billigare enn dei ein kjøper på dyre designbutikkar, bomull er godt å strikka med (iallfall dei to typane eg har brukt) som ein forandring frå ull og alpakka og sist, men ikkje minst; ein kan få klutar i akkurat den fargen ein vil. Supert dersom ein er oppteken av matching på kjøkenet.

Frisk bris

Som sagt i går, så har eg vore på butikken og kjøpt litt garn som skal verta til eit fargerikt bølgjeteppe.

Sidan eg aldri har hekla bølgjer før, så måtte det prøvast. Resultatet vart tre prøvelappar. Øverst har eg brukt heklekrok nummer 5, i midten krok nummer 4,5 og nederst krok nummer 4. Etter litt fundering har eg bestemt meg for at eg skal hekla teppet med krok nummer 4,5. Trur det vert best – ikkje for laust og ikkje for fast.

Faktaboks for spesielt interesserte:
Oppskrift: Neat ripple pattern. SUPER oppskrift! Godt og enkelt forklart med bilete for kvart steg
Garn: Sandnes duett, 55 % bomull og 45 % ull
Heklekrok: 4.5, Harmomy wood

Størrelsen på teppet har eg ikkje heilt planlagt. Sidan eg aldri har hekla eit bølgjeteppe før, anar eg ikkje kor mykje garn som går med. Duett er eit garn som er på veg ut, så det er heller ikkje så lett å få tak i meir seinare. Eg trur eg går for 130-140 cm breidde, så får eg hekla det så langt som eg har garn til. 

Med ynskje om ein strålande dag i regnet!

Håpefulle huer, del 3

Eg strikkar framleis på krefthuer. No er innsamlinga til St. Olavs avslutta, men det er starta ein påfyllingsrunde til Stavanger Universitetssjukehus. Du kan lesa meir om det her.

Her kjem første halvpart av huene eg har laga så langt:

Den grøne og den rosa er The Natural, strikka i Drops Karisma. Den blå er Lace Leaf Hat, også strikka i Karisma. Veldig fine og enkle mønster, engelske oppskrifter er som alltid godt forklart. Den rosa hua strikka eg rett etter den grøne, men utan oppskrifta framfor meg, så det vart litt på gefühlen. Det resulterte i omvendte fletter, men pytt, pytt. Litt variasjon er jo kjekt.

To heilt enkle stripehuer, strikka etter Judith si fantastiske oppskrift på huer frå toppen og ned. Garnet er Schachenmayr nomotta extra merino, så desse er mjuke og gode.

Endå to opp-ned-huer. Den mørkaste er strikka i Sterk og den lysaste i Falk. Huene har ikkje vrangbord nederst, så eg hekla ein kant med fastmasker rundt, slikt at kanten ikkje rullar langt oppover øyra.

Så er det litt lett blanding. Den kvite er Odessa, strikka i Tuva. Ei garantert kløfri sommarhue. Den mintgrøne (oppe til høgre) er Truffle, strikka i Sandnes alpakka.
Dei to nederse er Slouched Tuva Hat, strikka i Drops merino extra fine og Robin's Egg Blue Hat, strikka i Schachenmayr nomotta extra merino big.

Så er det ein liten bråte med huer som eg har hekla. Ein periode i vår var eg skikkeleg lei av strikkepinnane mine, så då fann eg fram heklenåla og masseproduserte huer. Alle er hekla i Schachenmayr nomotta extra merino big, så dei er ganske tjukke. Fine vinterhuer.

Eg har endå nokre huer som er ferdige, men dei tek eg i eit anna innlegg, for det kan jo verta for mange flate og kjedelege bilete av huer. Sånn går det når eg ikkje har huemodell tilgjengeleg.

Langtidsprosjekt

Rom vart ikkje bygd på ein dag, og det gjeld visst for nokre av prosjekta mine også. Dette teppet starta eg på for åtte månadar sidan, hekla intenst i nokre veker, så vart det kjedeleg og teppet landa underst i haugen med garn og ufoar.

For ei stund sidan fekk eg plutselig så lyst til å hekla, så då grov eg fram teppe, garn og heklenål. No har eg faktisk komme så langt at eg ikkje har nok garn til meir enn ein omgang av kvar farge. Sidan eg har meir av dei innerste fargane enn blåfargane, starta eg like godt ytterst og jobbar meg innover att, frå blått til lilla.

Planen er å få det ferdig til jul, så besta mi kan få det og varma seg på, men tida vil vise om det vert i år eller til neste år.

Heklehekta

Etter ein periode med intens strikking har eg vorte bittelitt lei av pinnane. Då fann eg ut at eg kunne ta fram det påbegynte teppet mitt og hekla vidare på det, men etter å laga ei rute var eg lei av det også. Dei same gamle fargane og vanskeleg garn å hekla med. Rutene får ulik størrelse uansett kor stramt eller laust eg heklar. Etter litt frustrert tenking, bestemte eg meg for å laga ei diger rute av alt det fargerike billiggarnet mitt. Som tenkt, så gjort. Etter å ha lagt garnet i system – frå lilla, raudt, oransje, gult, brunt, grønt, blått til grått, starta eg heklinga. Og no er eg hekta! Eg klarar nesten ikkje å leggja prosjektet frå meg. “Berre ein runde til, så eg får sjå korleis det vert med endå ein farge.” Høyres det kjent ut, eller? Eg håpar i alle fall at det held fram slik, for då skal det ikkje verta noko problem å få ferdig dette teppet!


Så langt har eg komme til no. Eg elskar fargane! Planen var å gi det vekk til jul, men no veit eg ikkje om eg klarar det. Det freistar mest å behalda det sjølv, så kanskje eg må hekla to?

For dei som er interesserte i fakta:
Garn: Safirgarn, Østlandsgarn og Rubin
Heklenål: 5
Mønster: standard bestemorsrute, to omgangar med kvar farge

Bestemorsruter

Då har eg begynt på årets julegåver. I fjor vart det eit stress utan like. Uventa julejobb og litt for mange prosjekt på litt for kort tid, gjorde at eg framleis ikkje er ferdig med pakkane som skulle vore pakka opp for snart to veker sidan. For å vera på den sikre sida i år, startar eg allereie no, så kan det henda at eg har full kontroll på pakkane i desember.

Den eine pakken i år vert eit hekla teppe. Etter å ha lært heklekunsten for ikkje så mange veker sidan, har eg fått dilla. Bestemorsruter er fine, kjappe og enkle å hekla. Dessuten har eg oppdaga ein måte å festa trådane på undervegs, så no er alt berre velstand.

Eg er usikker på kor stort eg skal laga det, men planen er i hvert fall å få eit teppe som går an å kvila middag under. Det er hekla i Alpa frå Trysilgarn med heklenål nummer fem. Rutene er på seks omganger kvar, så dei vert ganske store og luftige.

Elles har eg teke ekspressbåten heimatt frå juleferie i dag. Over fire timar på reise betyr kvalitetstid med strikkepinnane, så no er eg nesten ferdig med det siste sokkeparet som skulle vore julepakke.