Kavalkade

2009 har vore mitt første år som “seriøs” strikkar. Tidlegare har eg berre strikka eitt og anna prosjekt på skulen og grytelappar til dei gamle damene i familien. I år har eg strikka for full maskin, og resultatet ser de under.

Det går mest i sokkar, men eit behov for større utfordringar har resultert i litt babyklede også. Pluss huer, pulsvarmarar og isskrapevottar. Til neste år håpar eg på endå meir utviding innanfor fagfeltet.

Det er forresten mange like sokkar i montasjen, men sånn går det når eg strikkar fleire par i same garn og same farge.

Istid

Innimellom all sokkestrikkinga trengte eg eit par kjappe og enkle prosjekt, så då fall valet på isskrapevottar til dei bilkøyrande i familien. Praktisk når det er vinter og is på bilrutene.

Oppskrifta fann eg her. Det grå og raude garnet er Månetoppen, det blå er PT3. Til den oransje og blåstripete brukte eg dobbel Tove, om eg ikkje hugsar heilt feil. 40 grader i vaskemaskina saman med ein handduk, og svisj, svosj så var fire julepakkar ferdige. Den grå var den første votten eg strikka, så den vart nok litt for lang, men pytt, pytt.

#25, #26, #27, #28, #29, #30, #31, #32 og #33

Berre 19 par igjen! I sokkegarnskuffa mi har eg garn til det dobbelte, så dette bør gå bra.

Garnet som er brukt er litt diverse. Grøn PT5, lilla PT5, kvit Perfect, grøn, lilla og blå Sildre, sjøgrøn Sterk, brun Perfect, turkis Sisu og Drops alpakka og spraglete Järbo mellanraggi. Pinne nummer 3 på alle para, størrelsar frå 38 til 43.

Samtlege var julegåver, saman med 14 andre par.

#21, #22, #23 og #24

Det er visst over to månadar sidan siste statusrapport angåande dei 52 para, men eg held framleis koken.

Eit eplegrønt par i Perfect, størrelse 38. To nøster på pinne nummer 3.

Eitt nøste med lillabrunbeigespraglete Järbo Mellanraggi vart brukt til dette paret. Størrelse 39, pinne nummer 3.

Brune onkelsokkar, størrelse hest. Ein tråd Regia silk og ein tråd Fabel, pinne nummer 3. Tjukke og gode og varme til kalde, lange dagar utandørs.

Siste paret ut for denne gong er stripesokkar i glattstrikk. Lilla og gul pt5, pinne nummer 3.

Dessutan er eg ferdig med 7 og eit halvt par som eg ikkje har fått teke bilete av endå, så eg er faktisk over halvveges! *Jippi*

Sild med løk og dill

Eg føler meg vaksen når ynskjelista mi til jul består av nødvendigheitsting som bestikk, panner, vinglas, støvsugar og servise. Kjedelege saker, bortsett frå det siste. Eg har nemleg lagt min elsk på det nydelege Clupeaserviset. Ikkje så lett å få tak i, men det er lov til å håpa på at det ligg eit par blåe fiskar til meg under juletreet i år. Då vert det litt kjekkare med vaksenpakkar.

Det er forresten veldig lov til å skrika (eventuelt skriva) høgt ut dersom du har sild til sals!

HODE, skulder, kne og TÅ

Dei siste månadane har eg strikka sokkar i lange baner, slik at familien ikkje skal frysa på tærne. Så no var det på tide med litt varme på toppen også.

Tre huer er resultatet. Først The Boy Hat, strikka i Smart tweed. Nummer to er Turn A Square. Enkelt, men veldig fint mønster. Garnet som er brukt til denne er vel Safirgarn, om eg ikkje hugsar heilt feil, og Järbo fantasi. Genialt med fleirfarga garn til stripene, for då vert det mange fargar heilt av seg sjølv og eg slepp å festa så mange trådar.
Til slutt er det Stripey. Eg las ein plass at menn over 5o føretrekkjer huer som stoppar over øyrene, så eg strikka hua litt kortare enn originalen. Det stemmer visst, for denne fall godt i smak hjå pappa. Garnet er Sandnes alpakka. Mjukt og varmt.

På pulsen

Då var endå eit par med pulsvarmarar ferdige. Oppskrifta er også denne gongen ei eg fann i ei strikkebok som følgde med Hendes Verden. Garnet er Hifa 2 i ein nydeleg lillafarge, strikka på pinne nummer 3 og 2. Det gjekk med under 50 gram til to stykkjer. For å piffa litt opp fekk den høgre påsydd to små filthjarte i ein lyselilla nyanse.

Dei gule eg strikka for ei stund sidan fekk også litt pynt.

No ligg dei fint innpakka i julepapir saman med eit lilla sokkepar og eit gult. To julegåver mindre å tenkja på.

WIP

Det strikkast på høgste gir for tida. Eg er ikkje før ferdig med eit prosjekt før eg kastar meg over neste. Og i kjent stil har eg mange på pinnane samstundes, så det er litt å velja mellom.

I tillegg har eg funne ut at det hadde vore kjekt å sy strikkepinneetui til mi strikkande bestemor og grandtante til jul. Gamle damer har vel ikkje slikt ekstrautstyr?

Vel. Det er godt å ha noko å hengja fingrane i. ;-)

Helgeblogging

I det siste har det visst berre vorte helgeoppdateringar. Travle dagar på jobb gir ikkje så mykje overskot til anna enn enkel sokkestrikking om kveldane. Dessutan forsvinn det gode fotolyset så fort etter at me stilte klokka. Eg har ikkje før komme meg heim og fått i meg middagen, så er det bekmørkt ute. Ikkje tykkjer eg innebileta vert spesielt gode på denne tida av året heller.

Men i dag har eg hatt fri heile dagen, så då fekk eg endeleg utnytta dagslyset til å ta bilete av dei fiiine knappane som kom i postkassen for nokre dagar sidan.

Dei er bestilte herifrå. Ho har kjempemange fine knappar, ikkje er det dyrt heller.

Viss tida og lyset er med meg, vert det kanskje ei sokkeoppdatering att neste helg, for no har eg fått ein brukbar haug med ferdige par som ikkje er bloggifiserte.

Og vinnarane er …

… Mimouna, Guro, Innfall og Iden!

Sidan garnlageret mitt har okkupert så mykje av klesskapet mitt at eg ikkje får plass til verken sokkar eller vinterens ullklede, trakk eg like godt fire vinnarar, så krympar lageret forhåpentlegvis så mykje at eg kan få skvist inn litt av det som eigentleg skal vera i skapet.

Send meg adressene dykkar, så skal eg gå i garnlageret og finna passande premiar.

Konkurranse!

Teljaren min har passert over 1000 besøkande, og det må sjølvsagt feirast med ein liten konkurranse!
Skriv ein kommentar under dette innlegget innan neste søndag, altså den 25. oktober klokka 18.00, så trekkjer eg ein (eller kanskje to?) vinnar(ar) som får ein pakke i posten.

Fyr laus med kommentarar!

The devil wears stripes

Endeleg er eg ferdig med mi første djevelhue. Merkeleg namn på ei søt hue, men det har vel sine grunnar. Sjølve strikkinga gjekk fort unna, men det tok nesten ein månad før hua fekk knyteband og såleis kunne kallast for FO. Mine band vart ujamne og stygge, så eg sette heklemamma på saken, og etter litt svisj og svosj med heklenåla var hua ferdig.

Eg likar det enklast mogleg, ikkje noko samansying, så eg brukte Gro si oppskrift, der hua er strikka rundt. 14 gram grå Idena Bambino Ull og 27 gram Dale Baby Ull (garnprodusentane skulle hatt seg eit orddelingskurs, forresten).

Tanken var at nabojenta på 1 år skulle få hua. Sidan eg hadde litt tynnare garn enn i oppskrifta, strikka eg hua i størrelse 2 år og rekna med at den då vart passeleg til ein eittåring. Så feil kan ein ta. Eg strikkar visst laust, for hua er ganske gigantisk. Vel, vel. Det er sikkert greitt å ha ei hue på lager til ho vert 5 år også.

#20

Par nummer 20 er bittesmå sokkar til nabojenta. Oppskrifta er frå Strikk til Nøstebarn, størrelse 1 år. Det gjekk med 26 gram av Viking Frøyagarn på pinne nummer 3. Ikkje store innhogget i garnlageret, med andre ord.

#17, #18 og #19

Tre par i eitt innlegg – latskapen lenge leve.

Blueberry waffle, pinne nummer 3 og pluss/minus to nøster Perfect på kvart par. Dei raude er størrelse 38, dei blå 40-41 og dei gule 38-39. Alle saman landar i julepakkehaugen som veks sakte, men sikkert.

Langtidsprosjekt

Rom vart ikkje bygd på ein dag, og det gjeld visst for nokre av prosjekta mine også. Dette teppet starta eg på for åtte månadar sidan, hekla intenst i nokre veker, så vart det kjedeleg og teppet landa underst i haugen med garn og ufoar.

For ei stund sidan fekk eg plutselig så lyst til å hekla, så då grov eg fram teppe, garn og heklenål. No har eg faktisk komme så langt at eg ikkje har nok garn til meir enn ein omgang av kvar farge. Sidan eg har meir av dei innerste fargane enn blåfargane, starta eg like godt ytterst og jobbar meg innover att, frå blått til lilla.

Planen er å få det ferdig til jul, så besta mi kan få det og varma seg på, men tida vil vise om det vert i år eller til neste år.

Fretexfunn

Denne skatten av ein stol fann eg på Fretex på Voss. Då eg kom inn døra skreik han “KJØP MEG!”. Og som sagt, så gjort. Latterlege 125 kroner og herlegheiten var min. Utan å verken prøvesitja eller måla om han faktisk gjekk inni bilen min først.
Eg fekk han heldigvis inni bagasjerommet etter litt trykking og godsnakking. Sikta ut bakruta på resten av heimatturen treng me derimot ikkje prata høgt om. Det same med at han rett og slett er vond å sitja i.

Men kva gjer vel det når han er så herleg i seg sjølv? Ein finfin pyntestol. Det treng alle.

Gule og glade og ganske geniale

Det vert lenge mellom kvart blogginnlegg for tida, men det vert då produsert saker og ting likevel. Innimellom alle sokkane må eg ha andre prosjekt på pinnane, elles går eg fort lei. Siste innimellom-prosjekt som er ferdig er desse pulsvarmarane til bestemor mi.

Mønsteret fann eg i strikkeboka som følgde med Hendes Verden nummer 38. Skikkeleg genialt med vrangbord akkurat der handleddet er smalast, då held dei seg godt på plass uansett kva ein driv med.

Garnet er Hifa 2 frå Hillesvåg. Litt stivt og ujamt medan eg strikka, men etter vask og skol vart det mjukt og herleg. Det gjekk med 42 gram på pinne nummer 2 og 3.

Faktisk første gong eg har brukt pinne nummer 2. Noko så tynt! Eg sat med hjartet i halsen og angst for å knekka pinnane mine for kvar einaste maske eg strikka. Det tek nok litt tid før eg vert vant til å strikka med tannpirkarar, men desse vert det uansett fleire av under juletreet i år.

#15 og #16

No er det lenge sidan det siste sokkeinnlegget, men eg held koken.

Par nummer 15 er endå eit par med nesten Noro-sokkar, denne gongen i raudoransjerosaoglittblått-tonar. Det grå garnet er Robust – perfekt garn for folk som brukar sokkane mykje. Litt under eitt nøste Järbo Fantasi og litt under to nøster Robust gjekk med, størrelse 43, pinne nummer 3.

Så er det tilbake til standardmønsteret igjen på nummer 16, Blueberry waffle, denne gongen i ein herleg glad gulfarge. To nøster på pinne nummer 3, størrelse 43. To par til i julepakkehaugen.

Ny favoritt!

Shetland soft frå Malsen og Mor. 100 % ull, mjukaste av det mjuke og nydelege fargar!

Butikken har dessutan fine prisar, billig porto og kjapp levering. Anbefalast på det varmaste.

Varme striper

Innimellomsokkestrikkinga-prosjektet mitt er ferdig. Ein liten stripejakke. Strikka frå halsen og ned etter dette mønsteret. Det eine knappeholet strikka eg feil, så det er litt skeivt i forhold til dei andre, men pytt, pytt. Eg har brukt dobbel New Zealand lammeuld frå 123knit.com, 25 gram oransje, 25 gram raud og 50 gram brun. Pinne nummer 3, som vanleg og fem fine treknappar frå Panduro.

Pebble #3

Endeleg har eg strikka noko anna enn sokkar. Denne vesten har vore ferdig ei stund, men han har mangla den siste finishen. Grå og kjedeleg i utgangspunktet, men eg pynta litt med fargesterke knappar og nokre maskesting. Skilpadde på knappane og skilpaddde på ryggen.

Oppskrifta er denne, som dei to gongane tidlegare. Garnet er Schachenmayr Nomotta extra merino big. Det gjekk med nesten to nøster på pinne nummer fire. Eg strikka litt færre knapphol enn det oppskrifta sa, så eg brukte berre fem knappar.

No er det tilbake til sokkane, trur eg.

#14

Eplegrøne Perfectsokkar igjen, denne gongen i størrelse ein plass mellom 41-43. Julepakkehaugen aukar sakte, men sikkert. Det er godt, for no er det berre litt under fire månadar til jul.

Strikkestress.

#13

Nesten Noro-sokkane mine er ferdige.

Dei er heilt perfekte! Mjuke, varme og god passform. Desse vert nok dei nye yndlingssokkane. Det gjekk med nesten to nøster grått Safirgarn og nesten eitt nøste Järbo Fantasi på pinne nummer 3.

Lillafargen i nøstet er også heilt perfekt. Det vert nok strikka meir av dette garnet, gitt.

Nesten Noro

I lang tid har eg drøymt om sokkegarnet Noro. Sokkane som er strikka med det garnet vert så fantastisk fine - berre sjå her, for eksempel. Men den lokale garnbutikken min har det ikkje i sortimentet sitt, det er ganske dyrt (iallfall der eg har funne det på nettet) og eg har høyrt ein del negativt om det, så det har ikkje vorte til at eg har gått til anskaffelse av eit slikt nøste.

Uansett har stripene dukka fram på netthinna kvar gong eg har vore innom ein garnbutikk, og ein dag i sommarferien såg eg faktisk Norogarn. Trudde eg. Det viste seg at det var Järbo Fantasi eg hadde sett, men det likna veldig. Litt skuffa, men sidan det garnet ikkje var så dyrt tok eg med meg nokre nøster og betalte. Og for ein opptur! Garnet har nydelege og lange fargeskift, akkurat som Noro og sokkane blir i mine auge akkurat like fine som dei “ekte”.

Dessutan er hovudfargane i dette nøstet begge dei to favorittfargane mine – lilla og grøn.

No treng eg ikkje drøyma om Noro meir, eg har funne ein finfin erstatning.

#12

Endeleg ajour. Par 12 i veke 12.

Heilt like par nummer 9.
Blueberry waffle, 100 gram Viking sportsragg på pinne 3, størrelse 39.

Tok bilete av alle fire sokkane saman, så ingen kan tru at eg bloggar eit gammalt par under eit nytt nummer.

#11

Nummer 11 vart fargerike vafler. Desse er strikka i Järbo mellanraggi – endå ein ny favoritt i sokkegarnfamilien. 100 gram på pinne nummer 3.

Eg er litt lei av å berre strikka sokkar for tida, så no har eg starta på mønsterstrikka vottar. Uerfaren både når det gjeld mønsterstrikk og når det gjeld vottar, så begge deler samstundes skal verta ei interessant oppleving. Tida vil visa korleis dette prosjektet endar.

Den spede begynnelse:

#10

Nummer 10 er små vafler, størrelse 30-33. Siste par i ei bestilling på tre par barnesokkar. Det gjekk med akkurat eitt nøste Sildre på pinne nummer tre.

Det er merkeleg nok ikkje så gale å strikka einsfarga sokkar meir. Kanskje fordi eg strikkar “mønster”, ikkje berre to rett, to vrang heile tida.

#9

Dette vert visst nesten ein rein sokkeblogg for tida, men no er i hvert fall par nummer ni ferdig. Garnet er Viking sportsragg, eit nytt og veldig hyggjeleg bekjentskap. Mjukt, varmt, fine fargar og billig. Pinne nummer 3 og Blueberry waffle – sjokk.

Endå eit par i pakkehaugen, og vaffel nummer 10 er allereie på pinnane.

Bilete av begge sokkane ligg på Ravelry, for dei som vil sjå at maken er ferdig også.

#7 og #8

Fiks ferdig med to par til. Berre 44 igjen no.

Blueberry waffle og Perfect igjen – ny favorittkombinasjon. Det blå paret er herrestørrelse og det brune damestørrelse. Desse landar i pakkehaugen saman med dei raude blåbæra.

Ny grein

I tillegg til strikking og hekling har eg no fått auga opp for sying. Eg har omtrent ikkje teke i ei symaskin sidan eg tok symaskinsertifikatet i 6. klasse, så eg gjekk for eit enkelt og nyttig lite prosjekt.

Med litt hjelp frå husets erfarne syerske, fekk eg ferdig eit finfint papirlommeduketui. Mykje finare å ha i veska enn desse plastgreiene du kjøper lommedukane i.

Veldig fornøgd med resultatet og veldig stolt! Kanskje årets julegåver vert papirlommeduketui?