2 x FO

To stykk ferdige objekt er klare til bloggifisering:

Oppskrift: Pebble (Ravelry)
Garn: Schachenmayr nomotta Extra Merino Big (131)
Pinnar: 4 mm
Størrelse: baby. Meir nøyaktig enn det veit eg ikkje

Nummer to:

Oppskrift: Little sisters dress (Ravelry)
Garn: Dale Babyull (5245), ganske nøyaktig 81 gram
Størrelse: 3 månadar

Vesten er eg veldig nøgd med. Fine knappar, fin farge, godt garn og genial oppskrift. Kjolen er eg ikkje fullt så begeistra for. Fargen er veldig fin og knappane er søte, men garnet var ikkje spesielt godt å strikka med, og dessutan vart det ein del feil som viser litt for godt. Men oppskrifta er veldig fin, så det vert nok fleire kjolar, berre i eit anna garn.

Ellers går det sakte framover på strikkefronten for tida. Lange dagar på jobb øydelegg strikkelysta. Men det vert vel ei råd med det også med tid og stunder.

Nytt på nytt

Lønning og bytur =svidd bankkort. Denne gongen vart det kjøkenet som fekk fornya seg.

Ein blå kopp og tre ulike skåler – alt frå Indiska. Veldig fin butikk som har altfor mykje fint.

Påfyll

I dag fekk eg pakke med 22 fantastiske stoffknappar, kjøpt hjå den nye knappefavorittbutikken. Eg har ikkje superlativ nok til å beskriva knappane, så eg let bileta tala for seg sjølv.

Dyrehagen

På tur i dag traff me på eit representativt utval av arten ekledyroginsekt.

Ein frosk! Og slimete froskeegg.

Heldigvis var det ikkje berre ekkelt. Desse er jo søte og gode og mjuke.

Den kjæraste

Makroobjektivet er favorittdingsen min. Eg kunne ha brukt heile dagen i hagen med nasen i graset og peikefingeren på utløysaren.

Skattejakt

To fantastisk flotte dukar som skal få plass på stovebordet heime i Bergen eller bli sydde om til putetrekk – litt usikker, men fine er dei i hvert fall!

To nydelege boksar også. Desse skal få hedersplassen på kjøkenbenken.

Opp og fram

I det siste har eg gått over frå sokkar til større klesplagg. Pebble fann eg på Ravelry. Fantastisk enkel oppskrift (på engelsk!) og resultatet vart særs vellukka. Denne er strikka i Schachenmayr nomotta Extra Merino Big på pinne nummer 4. Heilt ubeskriveleg herleg garn.

Nøstebarn si strømpebukse (utan fot). Strikka i NZ lammeuld frå favorittnettbutikken på pinne 3, om eg ikkje hugsar heilt feil. Holrad til strikk øverst, 1 rett og 1 vrang på heile buksa, bortsett frå vrangborda nederst, som er 2 rett, 2 vrang.

Dessutan har eg ein til Pebble og ein Little sisters dress som ventar på trådfesting og knappar. Så fort det er gjort vert resultatet bloggifisert!

Søtaste søte

I dag har me vore på tur til onkelen min sine lambilamb og den herlegaste hunden i heile verda!

Dessutan fann eg blomstrar der oppe også. Etter at eg starta gartnarkarrieren min har visst plantene teke over for strikkinga.

907

Årets 17. mai vart feira på fjelltur til Hesteggi. Halvveges oppe var det nydeleg utsikt over den finaste bygda på Vestlandet. Sol, snø på fjelltoppane, grøne fjellsider og blomstrande frukttre.

Det siste stykkjet gjekk me på snø – noko som sjølvsagt måtte dokumenterast.

Ein til og endå ein til

To nye gensarar er ferdige. Oppskrifta er framleis denne. Den grå og blå er strikka i NZ lammeuld og den oransje og raude i Schachenmayr nomotta extra merino big.