Magiske pinnar

På pinnane

2012-02-08T14:18:00.001+01:00

Det vert visst langt mellom innlegga her på bloggen, av fleire grunnar. Av strikkemessige grunnar held eg på med minst ti ulike prosjekt samtidig. Når eit prosjekt kun får nokre få omgangar i veka, tek det litt tid før det vert ferdig.

I tillegg strikkar eg mykje med tannpirkarar for tida. Altså 2 og 2,5 mm pinnar. Det seier seg sjølv at det tek lang tid.

Akkurat no held eg på med tre vottepar på tynne pinnar, to på 2 mm og eitt på 2,5 mm. Dei grøne er mitt første vellukka mønsterstrikkprosjekt (jippi!), og dei gule og kvite er resultatet av denne nye kunnskapen. Dei blå er søndagsvottar med flette- og havskummønster, lagt opp til berre fordi dei var så fine.

Studie i strukturstrikk.

Elles har eg fått dilla på sokkar på 2,5 mm pinnar. Det vert tynne og gode sokkar som passar i litt andre sko enn gummistøvlar også, men det tek tid.

Utanom dette held eg også på med eit babyteppe (det hele kongerige), eit sjal til ein 80-årsdag, eit skjerf som skulle vore julegåve i fjor og vottar på tjukke pinnar (4 mm).

Det fine er jo at når eg først vert ferdig med alt, så har eg jammen mykje eg kan leggja i gåvekassa, for det er kun dei gule og kvite selbuvottane som er til meg sjølv av alt dette.

Lys i mørket

2012-01-21T15:07:00.001+01:00

Før jul hadde Kirkens Bymisjon sin årlege juleaksjon, Lys i mørket, der dei samla inn strikkaplagg til dei som treng det.

Huer er lett og kjapp strikk og noko dei hadde bruk for, så det passa perfekt med min plan om å slanka lageret. Eg fekk strikka fem stykkjer før eg vart lei huestrikk, men som alltid, så var det trådfestinga som tok tid. Det er så lett å tenkja at i morgon, då skal eg gjera det. Men så vert det jo aldri noko av i morgon, for då har eg funne noko anna eg må strikka på.

Resultatet er at huene framleis ikkje er levert (men alle trådane er festa no). Forhåpentlegvis treng dei huer til neste vinter også, og kanskje eg til og med får strikka endå fleire før ein ny vinter kjem.

Dei tre øverste + den blågrøne er strikka i restegarn, dobbel babyull og Smart, medan den mønstrete er strikka i Freestyle etter Arne & Carlos si oppskrift. No er eg tom for Smart, Freestyle og kvit babyull. Det er garn som aldri skal inn i lageret att, så det er eit godt steg på vegen mot kunhøgstnødvendigegarnsortarlageret, som er målet langt der framme. I tilegg fekk eg ferdig tre prosjekt frå lista mi. JUHU!

God helg til deg!

Nytt år, nye kunstar

2012-01-14T15:56:00.001+01:00

Eg er fantastisk heldig, for eg fekk handtein og kashmirull til bursdagen min! Eg har lenge hatt lyst til å læra meg spinning, men eg har aldri fått ut fingeren og bestilt meg utstyr, så dette var ei perfekt gåve.

Det er mykje jobb med å få tak i ulla, så eg skal bestilla meg litt “vanleg” ull til testspinning. Kan jo ikkje risikera at eg spinn fortøyingstau til Hurtigruta av den verdifulle kashmirulla mi heller.

Er du ein spinnar? I så fall tek eg gjerne imot gode råd og linkar til nettsider og bøker om temaet.

Nytt år, nytt pågangsmot

2012-01-12T14:36:00.001+01:00

Er det nokon som hugsar nyttårsforsettet frå i fjor? Definitivt ikkje eg! Som strutsen stikk eg hovudet i sanden (strikkekorgene) og fortset i same tralten som før - fem nye prosjekt på pinnane for kvart fullførte.

Men no skal det faktisk verta omvendt! Sjå berre her:

1. Eg skal slanka garnlageret. Altså ikkje handla garn med mindre det er høgst nødvendig, for eksempel om eg manglar garn for å få ferdig eit prosjekt, eller om eg får inn eit strikkeønskje som eg ikkje har passande garn til.

2. Eg skal gjera ferdig flest mogleg UFO-ar. Eit mål om null UFO-ar er ikkje oppnåeleg dette året, så eg må vera litt realistisk og ta det steg for steg.

For å lettare nå mål nummer to har eg sett meg opp ei liste over UFO-ane som er enklast å få ferdig.

1. Hjerteteppe – har faktisk strikka det ferdig den siste veka. Manglar trådfesting, vasking og blokking.
2. Lettstrikka hue – manglar samansying, snorer og trådfesting.
3. Stripete hue – manglar trådfesting.
4. Space invader-hue – manglar trådfesting.
5. Hekla gryteklutar – manglar trådfesting og damping.
6. Sjal – skal rekkast opp.
7. Brun selebukse – manglar litt samansying, trådfesting og knappar.
8. Kvite pulsvarmarar – manglar 1,5.
9. Kvit omslagsjakke – manglar ermer, snorer og trådfesting.
10. Beigebrun selebukse – manglar sele, samansying, trådfesting og knappar.
11. Blå sokkar – manglar omtrent 1.
12. Stripete sokkar – manglar omtrent 1.
13. Lilla sokkar – manglar omtrent 1.
14. Rosa sokkar – manglar omtrent 1.
15. Grå hue – manglar trådfesting.

Som de ser av lista er det ikkje så mykje som skal til før kvart prosjekt vert ferdig. Planen er at raske resultat skal gi meg lyst til å fullføre resten også.

Eit anna mål burde vera at eg skal blogga litt oftare, men det er jammen ikkje lett når lysta ikkje er her. Forhåpentlegvis stig ho i takt med antal ferdige prosjekt. I mellomtida les eg fine strikkebloggar og hentar inspirasjon til kva eg skal leggja opp til når eg har fullført fem UFO-ar.

Hugs småfuglane!

2011-12-15T13:40:00.001+01:00

Vinteren er lang og vanlegvis kald, så det er jammen ikkje lett å vera liten fugl i desse dagar. Difor er det lurt å henga ut mat til dei små fjørballane.

Eg har laga fuglemat sjølv, men kjøpt er supert også. Det fine med den heimelaga er at han inneheld mykje feitt, noko som gir meir energi gjennom dei kalde månadane.

Det er mykje du kan bruka, pass berre på at det ikkje inneheld salt eller sukker. Eg har brukt kokos, korn (havre, bygg, kveite og rug), puffa havre, fuglepeanøtter, solsikkefrø og hasselnøtter. Tomme yoghurtbeger (vaska) er supert til å laga maten oppi. Gjenbruk og matklumpen er lett å få ut når han har stivna. Fest ein tråd i botn av begeret og fyll oppi med frø/korn/nøtter. Smelt feitt (f.eks delfiafeitt eller matfeitt) og tøm over. Pass på at all maten vert dekt med feitt. Så set du begera kaldt til det stivnar.

Då vert det sjåande slik ut. Det er berre til å dra klumpen forsiktig ut etter tråden og henga opp ute. Fuglane her elskar det!

I tilegg har eg hengt ut solsikkefrø, meisebollar, nett med fuglepeanøtter, fuglepellets og kokosnøtt med fyll.

Det kostar ikkje mykje for ein sekk med solsikkefrø eller eit spann med meisebollar, så det er berre til å springa på butikken og kjøpa. Du får mange takknemlege fuglar på besøk.

Hugs på at dersom du har begynt å mata fuglane, må du halda fram heile vinteren.

Til julenissen

2011-11-28T21:32:00.001+01:00

Og familien.

Små trefjøler til å eta brødskive på
Gamle, fine juletrekuler
Mummikalendar 2012
Tynne ullsokkar (f.eks. Pierre Robert sine barnesokkar), str 38
Pierre Robert sports-bh
Skijakke
Ny fiskeveske (ikkje altfor stor, men ikkje altfor liten heller)
Veggladar til iPod
Gåvekort på XXL, Norli, Libris
Deler til det utskiftbare strikkepinnesettet mitt
Bøker:

Gunn Marit Nisja – Naken i hijab
Julia Gregson – De hvite englene
Lise Myhre – Nemi, farlig farvann (Nemibok nummer sju)
Helga Flatland – Alle vil hjem. Ingen vil tilbake
Tove Nilsen – Øyer i hjertet
Marita Fossum – Lykksalighet
Victoria Hislop – En aften på Kreta
Margaret Skjelbred – Du skal elske lyset
Jørn Lier Horst – Vinterstengt
Gunnhild Corwin – Etter dansen
Ingelin Røssland – Minus meg
Alyson Noël – Stråleglans
Anette Riise-Hanssen – Runesteinen, Drageferden og Frostriket
Lesebrett (Kindle)

Novemberdagar

2011-11-12T15:09:00.001+01:00

Folket har talt

2011-11-01T19:24:00.001+01:00

Og det vart alternativ 1.

Tusen takk for hjelpa, folkens!

Spør publikum

2011-10-31T16:24:00.001+01:00

Eg treng litt hjelp av deg, kjære lesar.

Eg har strikka ein dress som skal vera julegåve. Saman med dressen skal jenta få hue, vottar og sokkar (ikkje ferdige). Dressen er mellomgrå og det andre er raudt - ein skikkelig fin, varm, djup raudfarge.

Så, kva slags knappar skal eg velja til dressen?

Alternativ 1:

Kvite knappar med raude kattar. Kattane har ulikt mønster på magen.

Alternativ 2:

Raude plastknappar med kvite kattar. Eg har berre tre stykkjer, så dette alternativet er avhengig av at eg finn tre til på butikken.

Alternativ 3:

Svarte kattar med raud sløyfe rundt halsen.

Alternativ 4:

Både raude og kvite knappar med ulikt mønster.

Kva tykkjer du er finast?

Travel torsdag

2011-10-27T15:45:00.001+02:00

I dag har eg vore effektiviteten sjølv. Frå Fantoft til Askøy, Lagunen og Fyllingsdalen. Frå handlesenter til treningssenter. Både helgehandelen og –vasken er unnagjort. Eg har rydda, bretta klede, skifta på senga, teke oppvasken (!), støvsugd og vaska både her og der. Og sist, men ikkje minst, eg har kjøpt garn! Seks nøster med herleg gul alpakka som skal verta til hals til meg. Og seks nøster med Lima som skal verta til ei bursdagsgåve, ei julegåve og eit vottepar til berre meg. Skomakaren sine ungar og alt det der.

Det vert lang tid mellom innlegga her no, men sidan eg stort sett strikkar på julegåver for tida, har eg ikkje så mykje ferdigstrikka eg kan visa fram.

Håpar du også har ein super torsdag!

Statusrapport Socktober

2011-10-21T15:16:00.001+02:00

Me er over halvveges i månaden, så då er det verkeleg på tide med ei sokkeoppdatering.

Månaden begynte bra. Pinnane gjekk så det suste og par etter par (alt er relativt) vart påbegynte/ferdige. Litt etter litt dabba sokkestrikkelysta av og no er ho heilt vekke. Typisk rett før jul. Til gjengjeld er eg inne i ein god UFO-stim, noko som er høgst uvanleg, så eg bør vel ikkje klaga for høgt. Til no har eg fått ferdig to store og snart ein litt mindre.

Vel, over til sokkane. Først ferdig var konkurransesokkane.

Mønster: frå Bittami. Første sokk i Norsk sokkedilla.
Garn: Sisu frå Sandnes. Det gjekk med rett under to nøster.
Pinne: 2,5 mm.
Størrelse: ein plass mellom 39 og 40.

Neste par er SKA-sokkane for september.

Mønster: Nell. Det ligg som gratismønster på Ravelry. Greit mønster, men det vart liksom litt for holete til å vera sokkar.
Garn: PT5. Det gjekk med litt over to nøster.
Pinne: 2,5 mm. Ja, eg har sett lyset.
Størrelse: 39-40isj.

Fleire ferdige par har eg ikkje, men eg har ein haug med påbegynte.

Alle fem para manglar litt forskjellig, frå berre trådfesting til heile sokk nummer to.

God helg til deg som er innom!

Det bomullske tårn i Bergen

2011-10-19T14:11:00.001+02:00

Det siste året har eg funne ut at kjøkenklutar er perfekt ventestrikk. Tanketom og enkel strikk der det ikkje gjer noko om ein må gå midt i ein pinne. Det passar fint medan eg ventar på at middagen skal koka ferdig, medan eg ventar på at klokka vert nok til at eg må springa til bana, medan eg ventar på at den berømte sokk nummer to skal verta ferdig og så vidare.

Eg har tydelegvis venta mykje den siste tida, for haugen med klutar har vakse ut over alle støvleskaft, eventuelt ut over all skapplass.

For å få litt variasjon har eg hekla eit par klutar også. Det gir tjukkare og stødigare klutar, men dreg samstundes meir garn.

Eg har brukt to typar bomullsgarn, Paris frå Garnstudio og Petunia frå PT. Paris er tjukkare og gir mindre, men fastare klutar, medan Petunia er tynnare og gir større klutar. Paris er betrakteleg mykje billigare enn Petunia, men så er det jo det med størrelsen også. Eg tykkjer begge garntypane er gode å strikka/hekla med og har ingen favoritt. Det einaste må vera at Paris har eit heilt enormt fargeutval.

I forhold til bruk og vask over tid har eg endå ingen erfaring, sidan klutane er tenkt som gåver litt fram i tid.

Den raude kluten på biletet over er strikka i Petunia. Som ein ser er han mykje større enn dei andre. Den grøne er hekla i Petunia og er mykje mindre enn den raude, men samtidig er han fastare. Den gule kluten er strikka i Paris og det same er den grå, men han er vaska ein gong på 60 grader. Det er ikkje så godt å sjå på biletet, men etter vask vart kluten stødigare og kjennes mykje meir “klutete” ut.

Eg anbefalar klutstrikk/hekling på det varmaste! Det går kjapt, ein får brukt opp heile nøstet, ein får noko nyttig, heimastrikka klutar er mykje billigare enn dei ein kjøper på dyre designbutikkar, bomull er godt å strikka med (iallfall dei to typane eg har brukt) som ein forandring frå ull og alpakka og sist, men ikkje minst; ein kan få klutar i akkurat den fargen ein vil. Supert dersom ein er oppteken av matching på kjøkenet.

Sokkar in spe

2011-10-07T12:08:00.001+02:00

Socktober er godt i gang, så eg har rydda litt i sokkegarnskuffa. Eg trur det vert sokkar under treet i år også, ja. Ikkje treng eg handla meir for å ha nok til alle dei planlagde para heller.

Og dette er berre sokkegarnet som ligg hjå opphavet, brorparten befinn seg nemleg i ein tv-benk i by’n.

Septemberstrikk

2011-09-30T14:37:00.001+02:00

Det har vore lite strikkerelatert blogging i det siste, men pinnane får køyrt seg likevel. Akkurat no er eg inne i ein sokkestrikkeperiode. Mykje av grunnen til det er at eg har meldt meg inn i to grupper på Ravelry – SolidSocks og Sock Knitters Anonymous. I SolidSocks skal ein strikka sokkar i éin bestemt farge for kvar månad. September var raud. I SKA er det ulike utfordringar og designarar kvar måned, så kan ein velja det ein vil. I september valde eg designar, sidan eg ikkje hadde garn som passa til utfordringa (chartreuse). Det fine med SKA er at ein berre treng å leggja opp til sokken i løpet av månaden, ein har heilt til den siste dagen i neste månad til å strikka ferdig. Perfekt, sidan eg ofte strikkar på litt fleire enn ein ting om gongen.

I tillegg har eg meldt meg på DUSS inne på Uformelt. Det starta i januar, men eg fekk ikkje somla meg til å melda meg på før ni månadar seinare, så eg har altså åtte par som eg må ta att. Travelt, sa du?

Først ut er Hermine sine kvardagssokkar, mine septembersokkar i SolidSocks. Enkelt og greit mønster, men likevel vert det fine sokkar. Eg har brukt PT5 og pinne nummer 2,5. Det gjekk med litt meir enn to nøster til størrelse brei fot 40. Vanlegvis har eg brukt pinne nummer 3 når eg strikkar med PT5, men jammen vart det ikkje endå betre med 2,5. Då får det heller vera at det går med litt meir garn enn det gjorde før.

DUSS-sokkane for september var Carolina, eit supert mønster som passar perfekt til fleirfarga garn. Dei rosa nøstene mine med vellagra Fabel skreik etter å bli brukt. Litt mindre enn to nøster til størrelse 40, pinne nummer 2,5. Trur dette er mitt nye favorittmønster til spraglete garn – stilig, men samstundes veldig enkelt å hugsa. Perfekt til tv-strikk.

Eg har også meldt meg på Norsk sokkedille. Det er ein sokkestrikkekonkurranse med norske mønster designa av superflinke strikkedamer. Første sokk ut er laga av Bittami. Eg storkosar meg med mønsteret og nistrikkar for å bli ferdig fortast mogleg.

Sokkane i SKA treng heldigvis ikkje å vera ferdige før 31. oktober, så dei får kvila litt medan eg gjer meg ferdig med konkurransesokkane.

I morgon er det oktober, så då skal eg strikka lilla sokkar, DUSS-sokkar for oktober og helst eit par månadar til, sidan eg heng litt etter, SKA-sokkar for september og oktober og forhåpentlegvis fleire konkurransesokkar. Vel, vel. Me snakkast etter jul, folkens.

God helg, med eller utan strikketøyet!

Prosjekt 365 | veke 2

2011-09-20T16:09:00.001+02:00

Grunna tekniske problem kjem del to av 365-prosjektet mitt eit par dagar for seint.

12. september | Ufokusert?

13. september | Sikk sakk, det drypper på tak

14. september | Markens grøde

15. september | Her på fjellet

16. september | I all si prakt

17. september | Laurdagsgodt

18. september | Strikkesøndag

Nye kunstar

2011-09-15T16:54:00.001+02:00

På grunn av den %!&#@ ryggen har eg god tid til å strikka fram til jul og då må eg jo bruka tida fornuftig. Fornuftig = sjølvutvikling = læra seg nye, avanserte ting. Først ut på lista var sokkar strikka frå tåa og opp - altså motsett veg av sånn som eg pleier å strikka.

Det første problemet eg møtte på var tåa. Bra start. Eg fekk ikkje til nokon av dei oppskriftene eg fann på nettet, så til slutt lagde eg mi eiga tå, faktisk. Eg gjorde motsett av slik eg pleier når eg strikkar den vanlege vegen. Dvs at eg la opp det talet masker eg pleier å sitja att med til slutt og auka i den takta eg vanlegvis feller. Vips, så hadde eg ei fin-fin tå.

Då var det berre rein plankekøyring fram til hælen. Heller ikkje der skjønte eg nokon av oppskriftene frå nettet. Alle hadde jo så alvorleg mange fleire masker enn det eg hadde på pinnane, og ikkje fekk eg til å endra på oppskriftene så dei passa til masketalet mitt heller. Men så kom eg over denne fantastiske oppskrifta. Med berre fire masker meir enn eg hadde gjekk det supert.

Etter hælen var det ribbestrikk (tre rett, ein vrang) i fleire meter før eg kunne fella av. Avfellinga skulle visa seg å vera eit lite problem også, for då eg felte av slik som eg vanlegvis gjer, så vart det altfor stramt og sokken gjekk ikkje over foten. Ut på leit på nettet igjen og eg kom over Jeny’s surprisingly stretchy bind-off. Og jammen vart eg overraska, du! Makan til avfelling har eg aldri prøvd før. Anbefalast på det varmaste til alt som ikkje bør vera for stramt (f.eks genserermer).

Sokk nummer to gjekk mykje lettare og før eg visste ordet av det (sånn omtrent to dagar seinare) hadde eg eit par.

Eg er overraska over kor lett det faktisk var. Dessutan er tå-opp ein perfekt måte å få brukt opp absolutt alt garnet utan å måtta tenkja på om ein går tom før tåa er ferdig. Som ein siste bonus, så tykkjer eg faktisk at det tok mykje kortare tid å strikka ferdig eit par denne vegen.

Det einaste eg er litt usikker på er passformen. Heng tå-opp sokkar like godt fast som sokkar strikka den vanlege vegen, eller sig dei meir på grunn av den lause avfellinga?

Prosjekt 365

2011-09-11T15:44:00.001+02:00

Inspirert av mange andre har eg starta opp eit fotoprosjekt. I eit heilt år skal eg ta eitt bilete kvar dag. 365 dagar, 365 bilete. Eg starta 5. september 2011 og satsar sjølvsagt på å halda ut til 5. september 2012.

Målet med prosjektet er jo hovudsakleg å verta ein betre fotograf. Læra kameraet mitt betre å kjenna, utforska manuelle innstillingar og utfordra meg sjølv på motiv. Så får me sjå korleis det går.

5. september 2011 | Utbrent

6. september 2011 | Å sjå døden i kvitauget

7. september 2011 | Sov godt

8. september | Heimfarar

9. september | Sau

10. september | Gode minner

11. september | Nye kunstar

---

Oppdatering av prosjektet vert nok litt sånn med ujamne mellomrom, alt etter tid og lyst.

Vil du ha strikk til jul?

2011-09-07T10:15:00.001+02:00

Er du ein av dei som får julegåver av meg? Ynskjer du deg mjuke pakkar under treet i år? Då må du gi beskjed! Gi meg eit pip om kva du har lyst på, størrelse, fargar osv.

---

Fjorårets julegåver. Eg må starta snart skal eg komma opp i same mengde i år også. *Sveitt*

Tysdagstur

2011-09-06T16:03:00.001+02:00

Dagen vart starta med ein tur på Gullfjellet. Det er herleg å kunna vera heilt for seg sjølv, føla seg som den einaste personen i heile verda, sjølv om ein deler by med over 260.000 andre. Ingen andre menneske i sikte og dei einaste lydane ein høyrer er vinden og sauebjøller langt vekke.

Godt med ein slik tur både for rygg og sinn.

Det bur heldigvis sauer i by’n også.

Vått og gjørmete var det, men det gjer det berre ekstra godt når ein kjem heim. I kveld kan eg sitja inne i sofaen og sjå ut på regnet, strikka og lesa bok med god samvittigheit.

Håpar du har ein god tysdag også!

På pinnane

2011-09-01T17:33:00.001+02:00

Eg held framleis på med bittesmå plagg. Ei venninne er gravid og då må jo eg svinga pinnane! Til no er eg berre ferdig med ei lita hue frå Strikk til nøstebarn. På pinnane har eg ei omslagsjakke, også frå Strikk til nøstebarn og ei selebukse frå Myk start. Planen er sokkar, vottar og kanskje ein slik body som eg viste i forrige innlegg. Me får sjå kva som vert ferdig. Også litt usikker på kva som er kjekkast å få av klede.

Alt er strikka i naturfarga og brun babyull, sidan det då kan brukast til både gut og jente (tykkjer no eg). Enkelt å vaska er det også.

Elles fekk eg fine solsikker hjå mamma då ho var på besøk. Gul er den nye favorittfargen, så dette er ein skikkeleg bli-glad-blomst!

Håpar du som er innom har ein fin dag!

Det lille under

2011-08-28T16:32:00.001+02:00

Feste-trådar-sy-i-knappar-hekle-snorer-sy-saman-mamma på besøk er jammen effektivt. Eg har fått rydda skikkeleg i strikkekorga (-ene), så no kjem det forhåpentlegvis ferdigstrikka plagg på rekkje og rad her.

Først ut er litt babyundertøy eg har strikka. Kjekt med sånt som veks raskt på pinnane og vert fort ferdig.

Undertrøye

Faktaboks:

Oppskrift: Baby i rib
Størrelse: 0-3 månadar, ekstra lengde
Garn: Shetland soft frå Malsen og mor
Forbruk: 36 gram (med kokosnøttknapp)
Pinnestorleik: 3 mm, trur eg. Dårleg hukommelse

Body med lange ermer

Faktaboks:

Oppskrift: Benjamins voksebody
Størrelse: 0-5 mnd
Garn: Dale Daletta
Forbruk: heile saken veg 116 gram med 9 perlemorsknappar
Pinnar: 2,5 mm og 3 mm

Dette var verkeleg ei super oppskrift som eg kan anbefala på det varmaste. Veldig godt skreve, lett å forstå og enkel å strikka. I tillegg er det tips om å sy i to sett med knappar nede, slik at bodyen kan brukast lengst mogleg.

Begge deler er tenkt til ein liten gut, så no må eg berre få vaska det og sendt det i posten. Kjenner eg meg sjølv rett, tek vel det si tid også.

Nyt resten av søndagen! Eg skal baka brød og strikka omslagsjakke.

Gåvestrikk

2011-08-23T18:45:00.001+02:00

Det nærmar seg jul og tradisjonen tru strikkar eg sokkar.

To par er ferdige. Det grøne og raude er strikka i PT5 på pinne nummer 3. Det rosa og lilla er strikka i Silja på pinne nummer 3. Oppskrifta er ein blanding av den eg lærte hjå mamma og hæl frå Strikk til nøstebarn. Det gjekk med litt meir enn eitt nøste grønt og litt mindre enn eitt nøste av kvar av dei andre fargane.

Endå fleire par er under produksjon, så det vert nok ikkje så lenge til neste sokkeinnlegg.

Hytteliv

2011-08-11T12:00:00.000+02:00

Koseleg å koka middag på tidenes minste komfyr.

Besta sine strikkasokkar og –tøfler heng klar dersom ein frys på føtene. Ingenting varmar som dei.

Skikkeleg heimalaga medisinskrin. Ei skoøskje med to bærkorger oppi.

Termometer på boks (?).

Regnskogvennleg grillkol.

Blåbær!

Vestlandet skulle ha vore på blå resept.

Sommaren på flaske

2011-08-10T19:10:00.001+02:00

Eit stort spann med rips.

Og endå litt meir rips frå frysaren.

Bittelitt blåbær, berre fordi det var det einaste me fann den dagen og blåbær er for fint til å kastast.

Solbær. Kunne godt ha vore meir, men fuglane har ete opp resten.

Og eit heilt spann med frosne villbringebær frå i fjor. Rett bak gata vår er det det villbringebærparadiset. Heldigvis for oss er det ingen av naboane som bryr seg.

Ha alt saman oppi ei stooor panne saman med litt vatn i botn. Kok lenge og endå litt lenger, sil og kok opp att med så mykje sukker som du tykkjer er nok.

Vips, så har du sommaren på flaske, klar til å nytast ein kald og grå vinterdag.

Oppussing pågår, del 2

2011-07-22T15:06:00.001+02:00

No var det endeleg kista sin tur. Eg er mektig lei av furufarga møblar, så også denne fekk seg eit målingsstrøk.

Denne gongen brukte eg fargen Siv frå Jotun Sens. Ein litt ubestemmeleg grøngrå farge som skiftar veldig etter lyset og kva fargar som er på møblane attmed. Men fin er den så absolutt.

Sidan treverket var behanda vaska eg først med grønsåpevatn, så pussa eg ned med fint sandpapir. Etterpå grunna eg to strøk med vanleg sperregrunn før eg målte to strøk med vanleg måling.

Kista har fått plass ved sidan av Fretexfunnet mitt. Eg berre elskar den stolen! Skikkeleg gladstol. Han skal også få seg litt pleie, men det vert ikkje før litt seinare.

No har eg målt det eg skal måla og eg har kjøpt og skrudd opp ny bokhylle, så no står det att berre eit par småting før eg er ferdig med prosjekt oppussing av barndomsrommet.

Del 1

Tapetkupp

2011-07-21T19:13:00.001+02:00

Eg har lenge hatt lyst på tapetprøvar til å laga bilete av og dekorera saker og ting med, så gleda var mildt sagt STOR då eg var på handletur i går med to fine venninner og ho eine kom over ein butikk som ga vekk tapetprøverullar GRATIS! Eg tok så mange at eg hadde armane fulle.

Dessutan bestilte eg tapetprøvar frå Måleributiken for nokre dagar sidan og i dag låg dei i postkassa. Super butikk som anbefalast på det sterkaste. Dei to første prøvane er gratis, deretter kostar kvar prøve 20 kroner. Kvar prøve er omtrent ein meter lang, så her er det mykje tapet for pengane. I tillegg er det gratis frakt og superrask levering.

No sit eg her og beundrar alle dei fine rullane mine medan eg planlegg alt eg skal laga. Til no er planen å pynta hermetikkboksar og bladordnarar og å laga eit par bileter. Forhåpentlegvis vert det ikkje så lenge til neste tapetinnlegg.

Håpar du har fine sommardagar!

Feriedagar

2011-07-10T13:22:00.002+02:00

Hardangerfjorden skal visst vera veldig flott.

Dyreparken – eit stort høgdepunkt

Skagen – kan ikkje beskrivast, må opplevast

Frisk bris

2011-06-29T15:38:00.001+02:00

Som sagt i går, så har eg vore på butikken og kjøpt litt garn som skal verta til eit fargerikt bølgjeteppe.

Sidan eg aldri har hekla bølgjer før, så måtte det prøvast. Resultatet vart tre prøvelappar. Øverst har eg brukt heklekrok nummer 5, i midten krok nummer 4,5 og nederst krok nummer 4. Etter litt fundering har eg bestemt meg for at eg skal hekla teppet med krok nummer 4,5. Trur det vert best – ikkje for laust og ikkje for fast.

Faktaboks for spesielt interesserte:
Oppskrift: Neat ripple pattern. SUPER oppskrift! Godt og enkelt forklart med bilete for kvart steg
Garn: Sandnes duett, 55 % bomull og 45 % ull
Heklekrok: 4.5, Harmomy wood

Størrelsen på teppet har eg ikkje heilt planlagt. Sidan eg aldri har hekla eit bølgjeteppe før, anar eg ikkje kor mykje garn som går med. Duett er eit garn som er på veg ut, så det er heller ikkje så lett å få tak i meir seinare. Eg trur eg går for 130-140 cm breidde, så får eg hekla det så langt som eg har garn til.

Med ynskje om ein strålande dag i regnet!

Juni? Oktober?

2011-06-28T23:05:00.001+02:00

Skodda ligg tjukk heilt ned til fjorden og det regnar så mykje at eg vert våt gjennom regnjakken min. Det er nesten så eg kjenner at vinterdepresjonen kjem snikande.

For å muntra opp dagane litt har eg vore på garnbutikken og kjøpt litt garn i friske sommarfargar. Planen er å hekla eit skikkeleg gladteppe. Meir om det i morgon.

Håpar du ikkje regnar vekk der du er!

Prosjekt UFO-reduksjon, #1

2011-06-20T21:23:00.001+02:00

Første prosjektet på lista er ferdig, nemleg den blå- og kvitstripete omslagsjakka frå Strikk til nøstebarn.

Dette er ein skikkeleg UFO. Eg la opp den 26. juli i fjor, altså snart eitt år sidan. Planen var at naboguten skulle få denne til jul same året. Han er fødd i midten av juni, så eg la opp til størrelse 6 månadar og satsa på at det ville passa fint til vinteren. Men jakka vart altså ikkje ferdig før i dag. No har guten runda året og han har flytta herfrå, så då vart det visst ikkje jakke på han likevel.

Eg (les: mamma) hekla ein kant rundt heile jakka for å skjula fargeskifta. Snorer både inni og utanpå til å knyta saman med.

Jakka er strikka i Dale babyull på pinne nummer tre. Eg strikka ermene fram og tilbake og sydde saman etterpå for å sleppa alle vrangmaskene. Latskapen lenge leve. Elles har eg gjort akkurat som i oppskrifta.

Med ynskje om ein fin måndagskveld! Eg skal til på neste prosjekt på lista mi.

Stille

2011-06-19T23:12:00.001+02:00

Denne bloggelysta går visst litt opp og ned for tida. Medan bloggen har vorte forsømt, har pinnane derimot gått på høggir. No må eg berre få festa litt trådar og sydd i knappar, så vert det eit strikkeinnlegg snart også.

I mellomtida får de sjå på dei fine husdyra som bur i hagen her.

Håpar de får ei GOD veke!

Ikkje arbeidslaus

2011-06-09T21:23:00.002+02:00

Etter å ha rydda i strikkekorgene mine (ja, eg har fleire), har eg bestemt meg for at i sommar SKAL eg få ferdig minst ein UFO i veka.

Sidan eg har uhorveleg mange påbegynte prosjekt, fann eg ut at eg måtte sortera litt og laga ei liste med dei prosjekta det er mest sannsynleg at eg kjem til å fullføra i næraste framtid. Ei liste med alle dei 30-40 UFOane eg faktisk har, ville teke knekken på fullføringslysta før eg hadde fått skreve ferdig lista. Difor desse 15 utvalde:

1. Blå- og kvitstripete omslagsjakke frå Strikk til nøstebarn
2. Grå nøstebarnsdress
3. Hjertebabyteppe
4. Babyjakke strikka i eitt stykkje, alpakka
5. Rosa sokkar i Sterk
6. Grå flettesokkar i Perfect
7. Gule sokkar i Perfect og Sisu
8. Blå sokkar i Perfect
9. Blåspraglete sokkar i Tresko
10. Lillamelerte sokkar i Sterk
11. Havskumsokkar i Sterk
12. Sjøgrøn alpakkahue
13. Beige baby i rib
14. Lettstrikka babyhue
15. Rundfellingsjakke frå Strikk til Nøstebarn - manglar ermer, knappar og trådfest

Litt diverse å velgja mellom. Nokre prosjekt manglar alvorleg mykje (slik som dressen som berre har to føter til no), nokre manglar berre trådfesting (hallo mamma!), nokre er store (teppe – kva tenkte eg på?!) og nokre små (puh), men det er greit med litt variasjon, så eg kan ferdigstilla etter strikkehumør og –lyst.

Som den periodeoptimisten eg er, så heiar eg stort på meg sjølv! :-D

Hurra!

2011-05-27T15:22:00.001+02:00

Ein 20-årsdag og ein 60-årsdag i familien må jo feirast med muffins. Brune og gule, pynta med melis og sjokoladeglasur, nonstop, kakestrø og sjokoladehjarter. Rett nok ikkje på same muffinsen, det hadde vorte litt mykje. ;-)

Då er det berre til å håpa på at bakverket fell i smak hjå den eldste jubilanten. Den yngste får heller venta til sommarferien dersom ho ynskjer seg muffins.

Det er ikkje ofte eg får til så fine muffinsar. Akkurat passe mykje deig oppi kvar form, akkurat passe mykje steikt, ingen vulkankrater og heilt fantastisk smak! (Sjølvskryt er bra når det er fortent. ;-))

Eg har definitivt funne mi favorittoppskrift. Dette er tredje gongen eg brukar ho og alle tre gongane har eg fått til muffins som både ser ut som og smakar som muffins. Jippi! Denne skal skrivast inn i kokeboka mi.

---

Håpar du får ei nydeleg helg!
Her ser det ut som om sola er på veg tilbake, så eg skal ut og innvia solstolen min som eg typisk nok kjøpte dagen før regnet kom.

Ja, det er Mummi

2011-05-26T21:53:00.001+02:00

Sidan sist har det vorte litt fleire koppar.

No har eg alle dei “vanlege” koppane som har vore i sal sidan eg starta samlinga mi, så no ventar eg berre på at sesongkoppane kjem ut.

Tørketid i regnet

2011-05-22T14:44:00.001+02:00

Strikkelysta har tydelegvis teke ferie, for no er eit par omgongar på ein kjøkenklut alt eg orkar om dagen.

Så som pausefisk får de eit par garnnøster in spe.

Håpar du får ein god søndagskveld og ei flott veke!

Blomster, blomster, favnen full av blomster

2011-05-18T10:00:00.001+02:00

Det spirer og gror i hagen og i den anledning har eg lufta makroobjektivet mitt.

Oppussing pågår

2011-05-16T16:50:00.001+02:00

Rommet mitt heime hjå opphavet er ikkje akkurat innreidd med stil. Litt diverse trefarga møblar og ei skranglete, knallblå hylle frå barndommen er ikkje heilt meg. Difor har eg bestemt meg for at rommet skal verta nytt. Måling, grunning og kostar vart innkjøpt og eg sette optimistisk i gong.

Første møbel ut var kommoden som bestefar har laga. Ein skikkeleg solid og flott kommode, men svarte krusedullar teikna av ein ung kunstnar var ikkje akkurat fint, så denne fekk seg eit målingsstrøk.

Sjøgløtt frå Jotun Sens. Fiiin blålysturkisgrøn farge.

Ei målt skuff og ei skuff med to lag kvit sperregrunn.

Og slik vart resultatet. Meget bra! Fargen er akkurat slik eg har sett for meg og eg er særdeles lukkeleg.

No ventar berre resten av møblementet på at eg skal få sommarferie og god tid til å svinga målarkosten.

God 17. i morgon!

Onsdagslukke

2011-04-27T20:21:00.001+02:00

Sommarblomster i krukka og på bordet ute.

Nye putetrekk med fint mønster.

Selskap av katten som kosar seg i sola.

Klesvask som kan turka ute.

Kald iste, vannmelon og druer saman med nytt, spennande pensum.

Håpar du som er innom har ein like fantastisk onsdag!

Fargerikt

2011-04-25T13:26:00.001+02:00

Endå eit prosjekt som vart ferdig i påskeveka. Det var greit med litt tanketom strikking til all påskekrimmen som eg fekk med meg dei dagane eg levde mitt liv som ei sofapute.

Eit heilt enkelt baktusskjerf (eller er det karius når det er rillestrikk?) i Mirasol Hacho. Garnet vart kjøpt for eit par år sidan, men eg har ikkje heilt visst kva eg skulle bruka det til, så det har lege godt gøymt under senga. Garn med så korte fargeskift er ikkje så lett å laga noko fint av, men her tykte eg fargane kom til sin rett utan at det vart altfor slitsomt å sjå på.

Eg brukte tre hesper (150 gram) på pinne nummer fire. Skjerfet vart utruleg mjukt og godt – skulle nesten tru at det er bomullsgarn, så mjukt er det.

Må berre ta med eit bilete av ei av krukkene til mamma. Det er herleg med vårblomster!

Med ynskje om ein SUPER siste påskeferiedag!

Ferdigstrikka

2011-04-24T15:03:00.001+02:00

Det er jammen lenge sidan eg har vist fram noko som er heilt ferdigstrikka her på bloggen, men no i påsken har eg faktisk fått ferdig litt diverse. Først ut er to par med sokkar.

Eit fargerikt par til mamma.

Faktaboks for spesielt interesserte:
Garn: Schoppel Wolle Zauberball, fargen Fuchsia
Pinne: 3 mm. Sidan eg ikkje orka å strikka med sytråd på tannpirkarar, la eg tråden dobbel. Det vart heilt perfekt – mjuke og gode sokkar.
Str: 40
Oppskrift: heilt standard sokk, 48 masker. Til vanleg strikkar eg ribbestrikka brot, men denne gongen vart det glattstrikk av rein latskap.

Det neste paret er bittesmå sokkar til ei lita jente.

Faktaboks for spesielt interesserte:
Garn: Smart – satsar på at jenta veks ut or sokkane før ho slit hol på dei.
Pinne: 3 mm.
Str: 1-2 år.
Oppskrift: frå Strikk til nøstebarn.

No skal eg tilbake til symaskina og sy meg endå eit putetrekk.

Håpar du får ein super søndagskveld!

Sjå, ho syr

2011-04-23T15:36:00.001+02:00

Påskeferie med prolaps = tid til å gjera ting eg elles ikkje har tid til.

Difor har det denne veka vorte mykje strikking og unormalt mykje ferdigstrikka. Men, tru det eller ei, ein kan faktisk verta litt lei av å berre strikka også. Så etter å ha baka fem brett med bollar, sett veldig mykje på tv og lagt i saman haugar og dungar med klede fann eg ut at eg skulle sy.

Etter mykje strev og litt feilsying fekk eg til to putetrekk. Litt skeive og litt for store, men elles heilt perfekte.

Stoffet er frå stofflageret mitt, alt saman kjøpt på Stoff og stil. Bakstykkja er eit gammalt laken frå mamma sitt lager.

Syinga ga meirsmak, så no vert det storproduksjon av putetrekk.

Blargh

2011-04-13T15:18:00.001+02:00

På ein dag der halsen kjennes ut som pigggtråd, eit einaste bittelite komma har øydelagt
H E I L E den fine påskeferien som eg har venta på og lengta så intenst etter og den elendige ryggen min er det einaste som hindrar meg frå å jamna heile huset med jorda, er det jammen godt at butikken har jordbær og skål med Sniff på.

No skal eg grava meg ned i sofaputene og furta i eit par timar før eg tek meg saman, restartar harddisken og rettar fokuset mot laaang sommarferie om 9 veker.

For å vera litt positiv også, så er det jammen noko som liknar på vår i Bergen for tida. Blå himmel mellom alle skyene, litt sol og blomster i hagen.

Håpar du også har noko å gleda deg over i dag!

På flyttefot

2011-04-06T14:13:00.001+02:00

Garn i plastposar og plastkassar stabla i høgda er ikkje spesielt koseleg på soverommet, så i dag har eg rydda plass til alt gullet mitt i boden.

Endeleg litt orden, og ikkje minst så er det ubeskriveleg herleg å få tilbake eit soverom med kun kommode og seng.

Fiskelukke

2011-04-05T07:26:00.000+02:00

Det vart ein fin fangst i helga.

Det er heilt fantastiske fargar på fiskane.

Eg er klar for middag for åtte, frukost for tretten og kaffi for seks. Tre stykkjer kan få servert egg.

Ha ein super tysdag! Eg skal i fiskebollemiddagsbesøk etter skulen og gler meg storveges.

Husmortips

2011-04-04T15:32:00.002+02:00

Etter å ha jobba som heimehjelp i over eitt år til saman har eg lært meg litt om vasking og vaskemiddel. Og stort sett har konklusjonen vore at mykje av det som fins på markedet ikkje fungerar betre enn vanleg vaskemiddel. Så her i huset har det gått i zalo, salmiakk, heilt vanleg ajax original og litt klorin dei gongene eg har vaska kvite t-skjorter saman med svarte dongeribukser.

Men etter at eg var på besøk hjå ei venninne som vaska steikeomnen sin har eg funne unntaket frå regelen, nemleg Jif ovn/ugn og grill. Makan til fantastisk vaskemiddel har eg ikkje prøvd på lenge.

Biletet av klutane før og etter talar vel for seg sjølv.

Før- og etterbilete av komfyren var vanskeleg å få til, for alt vart berre svart uansett.

No gler eg meg til å laga middag i heilt rein steikeomn og Jif ovn/ugn og grill er skreve på handlelista for framtida.

Med ynskje om ein super måndag - med eller utan steikeomnvask

Fullada batteri

2011-03-27T18:16:00.001+02:00

Helga har vore super. God mat, god familie, god natur og tidenes finaste dynetrekk! Eg sov som ein stein under eit mjukt trekk i favorittfargen.

Søndag vakna me til snø. Sjølv om det er fint med snødekte trær må eg innrømma at eg er litt lei no.

Superhunden må sjølvsagt vera med. Det er jammen ikkje ofte at propellen har tid til å stå i ro lenge nok til at eg får teke eit bilete, men det vart då eit par brukbare. På dei fleste var det berre ein svart, uklar strek.

Favoritten er pinnar (eigentleg heiter det vel stokkar i den størrelsen?)
Dess større, dess betre.

Den planlagde klutstrikkinga vart det visst ikkje noko av. Ein tur innom butikken i sentrum på laurdag resulterte i nye Ferrari-pinnar og litt raggegarn. Det måtte jo sjølvsagt testast ut med ein gong, så i stadan for mange klutar vart det to halve sokkar.

Vel, det trengst jo det også.

God søndagskveld til deg!

Endeleg helg

2011-03-25T19:32:00.001+01:00

Etter ei slitsam veke er det jammen godt å vita at det er fri i to heile dagar. Og endå betre er det når dei to dagane skal tilbringast hjå besta. Eg gler meg til to late dagar med fisking, tur med hunden og kanskje ein yndlingsmiddag eller to.

På strikkefronten har eg fått dilla på å strikka kjøkenklutar. Babyjakkar som var den store dilla for to helgar sidan, er no gørrkjedeleg og heile fire (!) bolar ligg i strikkekorga og ventar på ermer. Men der ligg dei godt, for no er det klutstrikk som gjeld. Sidan bomullsgarnlageret mitt var ikkje-eksisterande for eit par dagar sidan bar det ut på handling. Og i kjent stil klarte eg ikkje å begrensa meg, så då vart det med heim nøster i omtrent alle fargane som var på garnbutikken.

Det er jo kjekt med litt variasjon i fargane når det berre går i ein rett, ein vrang. Dessutan er klutane tenkt som gåver, då er det jo viktig å ha fargar som kan tilfredsstilla ein kvar smak. Planen er at eg berre skal ha med klutstrikkinga mi på tur, så då vert det forhåpentlegvis litt færre nøster og litt fleire klutar når helga er ferdig.

Sidan eg har vore uvanleg effektiv med ryddinga og vaskinga i dag vart overskotstida brukt til litt baking til helga. Til bursdagen fekk eg likt forkle som kjøkenhjelparen min, så no er det verkeleg stil over bakinga her.

20 rundstykkjer og ei krydderkake (som eg sjølvsagt gløymte å ta bilete av) er resultatet av eit par timar som husmor. Rundstykkje- og bollebaking har aldri vore mi sterkaste side – deigen er jo umogleg å dela i nøyaktig like store delar. For eit petimeter er ikkje det lett å leva med, så eg fann ut at det beste var å vega heile deigen, dividera på antal ønskte rundstykkjer og måla opp i passelege bitar. Moglegens litt skada av medikamentrekning heile veka. Resultatet er LIKE STORE og heilt perfekte rundstykkjer! Denne strategien skal definitivt brukast neste gong også.

No skal eg smørja meg eit rundstykkje, plassera meg i sofakroken og berre nyta resten av fredagskvelden.

Håpar du også har ein flott fredagskveld. Nyt helga!

Søndagstur

2011-03-20T16:06:00.001+01:00

Målet for turen var å finna havet, men det var ikkje så lett. Me rota oss bort i eit militært område, så då måtte me snu og gå andre vegen. Men heller ikkje den vegen førte til havet, berre langt inn i ein skog.

Sjø med land på alle kantar var det næraste me kom, men turen var fin likevel. Ein spennande sti innover skogen er lagt på minnet for nærare utforsking ved seinare høve.

Skal tru om skiltet har stått heilt sidan 1914?

Med ynskje om ein god søndagskveld!

Super søndag

2011-03-13T16:25:00.001+01:00

Sløv sofadag er herleg når det høljar ned ute.

To strikketøy – det eine litt meir krevande enn det andre, så kan eg veksla etter humøret.

Ny pynt i favorittfargen.

Tulipanar frå forrige helg. Gartnarmamma har lukkast med korleis behandla blomster-opplæringa.

Og sist, men ikkje minst; skikkeleg søndagsmiddag. ;-)

Håpar du også har ein super søndag!

Vest til fest

2011-03-01T16:34:00.001+01:00

Innimellom all den evigvarande teppestrikkinga trengte eg noko lite og kjapt. Etter litt surfing rundt på Ravelry fann eg Mina sin søte pyntevest. Passande garn hadde eg allereie, så då var det berre til å svinga pinnane. Dobbel tråd på pinne 4 + ei stille og roleg helg = hold på hatten, endeleg noko ferdigstrikka her i bloggen!

Ein pyntevest treng jo ein flott knapp, så då gjekk turen innom Knappehuset etter skulen i dag. Og jammen fann eg ikkje den perfekte knapp – ein liten diamant med litt gull rundt er jo supert til fest.

Prikken over i-en er den søte picotkanten rundt armane.

Alt i alt er eg supernøgd med resultatet og oppskrifta kan glatt anbefalast vidare! Lett å forstå og godt skreve, dessutan er så kjappe prosjekt definitivt ein favoritt.

Faktaboks for dei spesielt interesserte:

Oppskrift: Minas pyntevest
Størrelse: 6-9 månadar
Garn: Shetland soft, farge Petunia
Forbruk: 104 gram, strikka med dobbel tråd
Pinnestorleik: 4 mm

---

Det var faktisk så kjekt å strikka noko lite og kjapt igjen at eg allereie har lagt opp til eit nytt kjappisprosjekt. Så de skal ikkje sjå vekk i frå at det snart kjem ei FO-oppdatering att.

Håpar du har ein super tysdag!

Skruhelg

2011-02-20T13:01:00.001+01:00

Nevenyttige pappa på besøk må sjølvsagt nyttast på best mogleg måte, så no har eg fått reparert det som skulle reparerast og skrudd det som skulle skruast.

Bileta talar vel for seg sjølv.

257 (!) pluggar, skruer og dingsar seinare:

Ute er det snø, blå himmel og sol. Typisk at søndagen då må brukast på jobb. Men før jobbinga har eg rukke å nøsta litt garn som skal verta til ein liten ulldress.

Til jul skal nøstemaskin definitivt stå øverst på ynskjelista.

Håpar du har ein flott søndag!

Effektivt

2011-02-14T17:15:00.002+01:00

*Poff*

Seks ufoar vart med eit trylleslag redusert til nøster (og typisk nok ei skikkeleg floke som tolmodige pappa skal få ta seg av i helga). Eigentleg er det ganske kjekt å sjå at det vert betre plass til nye og meir interessante prosjekt i strikkekorga.

---

Det vert lite ferdigstrikka for tida, så det er stille her på bloggen. Det skuldast travle dagar og store langtidsprosjekt som gensar til meg sjølv og babyteppe på pinnane. Men det strikkast bak kulissane, så det kjem nok noko.

Med ynskje om ein god måndagskveld til deg som er innom og les!

Praktisk pynt

2011-02-13T13:08:00.001+01:00

Mitt siste storinnkjøp står på toppen av bokhylla og pyntar så fint opp.

Pynteting med bruksverdi er jammen supert. Og når all tråden er 8,4 kilometer lang og veg 1,5 kilo, så tek det ei stund før pynten er brukt opp også. Perfekt, med andre ord.

Søndagskos

2011-01-16T15:30:00.002+01:00

Ute er det regn, vind, skodde og is. Alt er grått, til og med snøen er meir grå enn kvit. Ein perfekt dag for ein innedag.

Oppvasken er teken, vaskemaskina surrar og går, golvet er støvsugd, boset tømt, aviskorga rydda og middagen er av den sorten som lagar seg sjølv i steikeomnen. Med andre ord, alt er klart for litt sofaliv! Med fyr i omnen kan eg setja meg godt til rette i sofakroken saman med det nye ullteppet og geiteskinnet som låg under juletreet. Nytt strikketøy i fin farge har eg også unna meg. Det er jo søndag og alle dei 30 (ja, eg er ferdig med ein) UFOane er godt vekkrydda og ute av syne.

Perfekt!

Den hele og fulle sannhet

2011-01-09T15:12:00.003+01:00

I romjula tenkte eg at januar måtte vera ein fin månad for rydding i strikkekorga. Nytt år, ny månad og nytt system i sakene. I går vart tenkte tankar til handling, men skal eg vera heilt ærleg, så er ikkje den ryddetanken det smartaste eg har tenkt på, for saman med ryddinga forsvann strikkelysta.

Eg fann nemleg 31uferdige prosjekt! T r e t t i e i n. Berre tanken på alt eg må strikka ferdig fekk lufta til å gå ut av ballongen. I tillegg til all strikkejobben er det nokre prosjekt som må rekkjast opp att litt på før eg kan fortsetja og endå fleire har eg gløymt kva størrelse eg strikkar i. I tillegg til alle trådane eg må festa.

Sjokket var så overveldande at eg stappa alt saman ned ei korg og gøymte ho bak tv-benken. Eg trur at eg må roa nervene med eit heilt nytt strikketøy i sofakroken, saman med tanken om at til neste år skal nyttårsforsettet vera å verta monogam på strikkefronten.

Kavalkade #2

2011-01-03T14:23:00.002+01:00

Tre dagar inn i det nye året er det på tide med ei oppsummering av strikkeåret 2010. Relativt likt som 2009, med små variasjonar. Det nye av året er skjerf, halsar, sjal, ulltrøye til vaksen, sitjeunderlag, vottar, kjøkenklutar og påskepynt, medan fjorårets pulsvarmarar og isskrapevottar ikkje har vorte ein slager i år.

I år SKAL eg strikka ein gensar til meg sjølv, elles vert det nok mykje det same som kjem på pinnane.

Spagettiføter

2011-01-02T00:15:00.000+01:00

Fjorårets kalde vinter, behov for ullklede til barnehagestart og sterk lyst til å strikka noko anna enn sokkar har resultert i ei ullbukse. Saman med polkagrisgensaren vert nok nabojenta varm og god - og det er bra, for minusgrader har det vore nok av så langt denne ullsesongen.

Det er mange månadar sidan buksa var ferdigstrikka, men det var ikkje før då mamma kom på besøk rett før jul at dei siste trådane vart festa. I tillegg har det teke eit par veker før eg fekk somla meg til å ta bilete og på toppen av dei heile, eit par dagar etter det att før buksa fekk strikk i livet.

Men NO er buksa heilt fiks ferdig og klar til å leverast til nabojenta. Med mykje omtanke i kvar einaste maske varmar ho forhåpentlegvis godt.

Min innebygde angst for at plagga eg strikkar skal verta for små og manglande erfaring med klede i miniatyrstørrelse = ei bukse som er like lang som mottakaren sjølv. Heldigvis kan føtene brettast opp og ribbestrikk er jo veldig elastisk, så buksa kan brukast fleire vintrar.

Oppskrifta er frå Strikk til nøstebarn, garnet er Rubin frå lageret (klapp på skuldra) og størrelsen er 2-4 år. Undervegs i strikkinga var det mykje svetting og banning over alle dei rette og vrange maskene og eg lova meg sjølv at eg ALDRI skulle strikka ribbestrikk att (unnteke eit par sokkeskaft i ny og ne). Vel. No er alt gløymt og eg har lagt opp til nok eit prosjekt med fleire kilometer ribbestrikk.

Gensar til vetlebroren er på pinnane, men tradisjonen tru vert han nok ikkje ferdig før sommaren er her og vel så det.

Med blanke ark og strikkepinnar til

2011-01-01T16:34:00.002+01:00

Nytt år, ny start, nye prosjekt på pinnane. UFOane frå i fjor er jo så 2010, så dei vert liggjande på botnen av strikkekorga.

Men fjorårets julegåver må likevel bloggast. Det vart 10 par med sokkar mindre enn i 2009, men tre sjal, tre halsar, tre huer, eit par med vottar, eit sitjeunderlag og eit herreskjerf veg vel opp.

Planane frå oppsummeringsinnlegget i 2009 har vel ikkje vorte heilt oppfylte, men kanskje eg må innsjå at sokkar er spesialiteten her i garden.

Uansett håpar eg at 2011 vert eit kreativt og produktivt år, både for meg og for alle de lesarar som er innom. Det er utruleg kjekt at de stikk innom og legg att spor.

Godt nytt år!

Adventskalendar

2010-12-12T14:43:00.002+01:00

Snille mamma lagar framleis pakkekalendar til meg, så i desember er det litt lettare å stå opp før fuglane fis.

Kalendaren som mamma har sydd for hand heng på ein spikar i gangen og pakkane ligg i ein fin pose på golvet under.

I tillegg må eg sjå NRK sin barne-tv-kalendar dei dagane eg er heime før seks, sjølv om eg tykkjer at dei kunne ha sendt Teodor eller Jul i Skomakergata.

Den siste kalendaren som eg må ha med meg er Strikkeoppskrift sin. Fine premiar, enkle spørsmål og sist, men ikkje minst, du kan faktisk svara på tidlegare luker.

Det er jammen kjekt med advent, spesielt når eg endå ikkje er for stor for kalendarar. ;-)

1. søndag i advent

2010-11-28T14:30:00.003+01:00

Kalendaren viser første søndag i advent, men sidan det ikkje er snø ute er ikkje følelsen av advent heilt på plass endå. Uansett må pynten fram.

Stovebordet har fått lilla duk på seg og adventsstaken har fått plass på kjøkenbordet.

Ein liten duk under dei lilla lysa på tv-benken gjorde også susen.

Stjerna heng i stoveglaset, men ho vert ikkje tent før det vert mørkt i ettermiddag. I desse kalde tider må ein vel ha respekt for Terje Riis-Johansen sine bekymringar, så her sparast det straum for harde livet. Ikkje %&#!@ om kjøleskapet mitt skal verta offer for kontrollert utkobling seinare i vinter.

Elles er det full fart på julegåvestrikkinga. Eg har ein fin stabel som er ferdigstrikka, men ikkje bloggifiserbar før etter 24. desember.

Kjære julenissen og bursdagsnissen

2010-11-20T23:22:00.006+01:00

Det er snart jul og bursdag. På oppfordring kjem ynskjelista mi:

Gavekort på Strikkebui
Gavekort på Ting
Mummi, Tove Janssons samlede tegneserier, bind 1, 2 og 3
Mummikoppar (manglar grøn med politimannen)
Gamle, fine juletrekuler
Nye selbuvottar
Garn (Sterk, PT5, Silja, Järbo Mellanraggi, Perfect, alt av babyull, Drops Merino Extra Fine, Drops Karisma, Drops Nepal, Sandnes Alpakka og Sandnes Minialpakka. Glad i alle fargar, unnteke lyseblått og rosa)
Rundpinnar
30 cm: 3.5 mm, 4 mm
40 cm: 2.5 mm, 3 mm, 3.5 mm, 4 mm, 4.5 mm, 5 mm, 6 mm
Helst Europris eller Sparkjøp sine
Strømpepinnar
2.5 mm, 3 mm, 3.5 mm, 4 mm, 4.5 mm, 5 mm, 6 mm
Helst Europris eller Sparkjøp sine
Fine knappar

Elles er det anbefalt å ta kontakt med julenissen si høgre hand (les: mamma) før innkjøp.

Då er det berre til å pussa glorien og håpa på ein fin haug under juletreet i år. :-D

Håpefulle huer, del 4

2010-11-15T15:56:00.002+01:00

Endå fleire huer til kreftavdelinga ved SUS er ferdige. Dei har faktisk vore ferdige i ganske så mange månadar, men det var det med den fotograferinga og blogginga, då.

Dei to svarte med grå striper har eg faktisk blogga før, men det var sjølvsagt gløymt då eg var heimom i helga og tok bilete. Snakkar me tidleg demens her, tru?

Dei fire andre har eg i hvert fall ikkje publisert her før. Dei er strikka etter Turn A Square-mønsteret, men med litt ulik lengde. Garnet er Tuva, så huene er garantert kløfrie og passar nok veldig godt om våren og sommaren. Så er det berre å kryssa fingrane for at eg får sendt pakken avgårde før det vert haust att.

Andre søndag i november

2010-11-14T18:54:00.004+01:00

To par sokkar, eitt til far og eitt til bestefar i anledning dagen.

Blå med smale striper av mørkeblått til pappa og svarte med striper av grått, blått, kvitt og grønt til bestefar. Alt garnet er Perfect, strikka på pinne nummer tre.

Vinter

2010-11-07T11:53:00.002+01:00

Løvstakken og resten av byen har kledd seg i kvitt. Livet kunne ikkje vore betre akkurat no.

Eg veit at eg har rusk på sensoren, men eg har ikkje teke julevasken endå.

Socktoberfest: oppsummering

2010-11-03T17:58:00.003+01:00

Oktober har faktisk vore ein veldig produktiv sokkemånad. Heile tre av UFOane er ferdige, og i tillegg har eg strikka ferdig to par heilt frå skrætsj.

Sidan det er mørkt ute når eg reiser til skulen og mørkt når eg kjem heim frå skulen, vert det kjedelege innebilete med blits og mørkeret som bakgrunn. Eg tykkjer ikkje at eg kan ta med meg sokkane og kameraet og ta bilete på skulen heller.

Dei grå og grøne er strikka i Perfect, dei fleirfarga i Regia, dei stripete i PT5 og dei raude i Sterk. Litt julegåvesokkar, litt bursdagssokkar og litt skisokkar til meg sjølv. Eigentleg har eg ikkje tid til å egoiststrikka midt i travlaste julestria, men, men. Skomakaren sjølv kan jo ikkje gå utan sko.

I tillegg til at julegåvestrikkinga går på høgste gir, har eg tilbudt meg å halda strikkekurs for strikkeinteresserte medstudentar. Eg gler meg verkeleg til å få dela interessa for garn og pinnar med andre på min alder, men eg lurer også litt på kva eg har sagt ja til. Eg er jo ikkje nokon strikkeguru. Det er nesten så eg vurderer om eg må leita opp eit kurs for korleis halda strikkekurs.

Socktoberfest

2010-10-04T16:03:00.006+02:00

I oktober har eg meldt meg på Socktoberfest - med c, sidan festen finn stad på Ravelry. Det er eit godt spark i baken, for eg har utallige sokkeprosjekt på pinnane, og i tillegg har eg mange julegåvesokkar som må strikkast.

For å starta med stil fann eg ut at eg skulle prøva meg på litt meir avanserte sokkar enn dei vanlege blåbærvaflene. Først la eg opp til Mock Wave Cable Socks, men dei vart IKKJE fine, så eg rakk rett og slett opp det eg hadde strikka og starta på Yukon Leaves. Og det vart andre bollar, gitt.

Fiiine (tykkjer eg sjølv) sokkar som skal få verta søndagssokkane.

Det som er ekstra fint med Socktoberfest er at det er lov med UFOar. Eg har fem par berre her i by’n, alle med litt ulik progresjon - alt i frå trådfesting til heile sokk nummer to står att.

Førebels er oktober via til sokkestrikking, så får me sjå kor lenge den piffen varar. ;-)

Stripestrikk

2010-09-30T17:44:00.002+02:00

Det er stille dagar her på bloggen, men det vert då strikka litt likavel. Faktisk mykje meir enn eg strengt tatt har tid til.

No for tida går det i striper i alle slags fargar og kombinasjonar – ikkje alle like heldige, men pytt, pytt. Merkeleg nok tykkjer eg at det går fortare å strikka striper enn berre einsfarga. Pinnane susar liksom avgårde for å bli ferdig med neste stripe og neste og neste, slik at eg får sjå korleis det ferdige resultatet vert. Har du same erfaring, eller er det berre eg som er rar?

Dette innlegget er faktisk mitt innlegg nummer 100. Det vert feira med eit bilete av den fine haustbuketten eg fekk her om dagen. Nyper som blomster var ein ny vri for meg, men det var jo veldig dekorativt.

Neste helg har eg planar om ein skikkeleg opprydding i strikkekorga. Trådfesting, vasking, fotografering og forhåpentlegvis bloggifisering. Så hald fast.

Småstrikk

2010-09-17T10:56:00.003+02:00

Innimellom all anatomien og latinsken må eg strikka litt også. Sist ut er ei hue til ei veldig fin venninne som hadde bursdag i sommar. Betre seint enn aldri.

Mønsteret er Intuitive, eit mønster som eg har strikka før med fint resultat. Eg gjentok suksessen med same garn og same pinnestorleik, nemleg Drops merino extra fine og pinne nummer 3. Det gjekk med nesten to nøster.

I tillegg er eg nesten ferdig med ei ny hue til bestefar (manglar trådfesting). Rapport heimanfrå seier at topphua hans syng på siste verset og om ikkje eg kan strikka ei ny til han til jul. Det kan eg sjølvsagt. Etter eit djupdukk i lageret fann eg to nøster med Smart. Rein ull som kan maskinvaskast er jo supert til ein utebestefar.

Så då vart det ei heilt enkel hue i ribbestrikk. Lang og mjuk og forhåpentlegvis varmar den godt også.

Neste prosjekt på lista er sokkar og vottar til venninnegjengen. Det går visst mot haust og vinter i Bergen også.

Med hale kort og med nese stor, det beste troll som fins på jord

2010-08-28T18:42:00.003+02:00

Medan venninne mine samlar på Hardangerbestikk og Rosendahl, samlar eg på Mummikoppar.

Samlinga tel no 24 koppar, men eg manglar framleis fire stykkjer og det kjem stadig nye, så det stoppar nok ikkje her.

Oppussing

2010-08-22T18:25:00.003+02:00

Det som berre var tenkt som litt justering på innleggsbreidda i bloggen vart visst til ekstrem forvandling. Men det er jo kjekt med litt forandring også.

Eg trur faktisk at eg kan trivast med mitt nye "jeg".

Nedgangstider

2010-08-22T13:41:00.003+02:00

Bloggen har vorte kraftig forsømt i heile sommar og det vert visst ikkje betre utover hausten. Studiestart og første eksamen i anatomi, fysiologi og mikrobiologi om berre seks veker fører til at det vert mykje mindre tid til strikking enn då eg jobba og hadde ettermiddagane ledige til anna enn lesing.

Men litt pauser må eg ha, og sidan eg er veldig god til å leggja opp, strikka litt og så finna nye prosjekt som freistar meir enn dei eg allereie har på pinnane, vert det mykje halvferdig og lite heilferdig.

Sidan sist UFO-oppteljing (der målet ikkje vart fullført, kun to ting vart ferdigstilte i perioden), har eg lagt opp til desse nye prosjekta:

To par med sokkar, ei bukse, to omslagsjakkar, eit sjal og ein kjole.

I tillegg har eg ein fin liten bunke med plagg som faktisk er ferdigstrikka, men manglar trådfesting.

Er det nokon som veit kvar eg kan senda søknad om fleire timar i døgnet, tru?

Mandagsgodteri

2010-07-26T15:27:00.002+02:00

Ein “liten” snartur innom garnbutikken resulterte i ein pose full av snop.

Og eg som liksom skulle slanka lageret for å få meg med alt garnet mitt til Bergen om to veker. Vel, vel.

Elles har det vore nokre stille veker her på bloggen. Sommar, mykje jobbing og litt andre prosjekt har teke tida og energien. Men strikking har eg fått tid til, så det kjem snart (alt er relativt) nye og ferdige prosjekt på bloggen.

Håpefulle huer, del 3

2010-06-22T22:39:00.003+02:00

Eg strikkar framleis på krefthuer. No er innsamlinga til St. Olavs avslutta, men det er starta ein påfyllingsrunde til Stavanger Universitetssjukehus. Du kan lesa meir om det her.

Her kjem første halvpart av huene eg har laga så langt:

Den grøne og den rosa er The Natural, strikka i Drops Karisma. Den blå er Lace Leaf Hat, også strikka i Karisma. Veldig fine og enkle mønster, engelske oppskrifter er som alltid godt forklart. Den rosa hua strikka eg rett etter den grøne, men utan oppskrifta framfor meg, så det vart litt på gefühlen. Det resulterte i omvendte fletter, men pytt, pytt. Litt variasjon er jo kjekt.

To heilt enkle stripehuer, strikka etter Judith si fantastiske oppskrift på huer frå toppen og ned. Garnet er Schachenmayr nomotta extra merino, så desse er mjuke og gode.

Endå to opp-ned-huer. Den mørkaste er strikka i Sterk og den lysaste i Falk. Huene har ikkje vrangbord nederst, så eg hekla ein kant med fastmasker rundt, slikt at kanten ikkje rullar langt oppover øyra.

Så er det litt lett blanding. Den kvite er Odessa, strikka i Tuva. Ei garantert kløfri sommarhue. Den mintgrøne (oppe til høgre) er Truffle, strikka i Sandnes alpakka.
Dei to nederse er Slouched Tuva Hat, strikka i Drops merino extra fine og Robin's Egg Blue Hat, strikka i Schachenmayr nomotta extra merino big.

Så er det ein liten bråte med huer som eg har hekla. Ein periode i vår var eg skikkeleg lei av strikkepinnane mine, så då fann eg fram heklenåla og masseproduserte huer. Alle er hekla i Schachenmayr nomotta extra merino big, så dei er ganske tjukke. Fine vinterhuer.

Eg har endå nokre huer som er ferdige, men dei tek eg i eit anna innlegg, for det kan jo verta for mange flate og kjedelege bilete av huer. Sånn går det når eg ikkje har huemodell tilgjengeleg.

Prosjekt frigjering av strikkepinnar

2010-06-16T19:29:00.003+02:00

Inne på Hobbyboden har Judith sett i gang ein uformell motivasjonskonkurranse for frigjering av strikkepinnar. Dette høyres verkeleg ut som noko eg må vera med på.

Eg visste at eg hadde ein del prosjekt på gong, men ikkje at det var så mange! Med 30 mm på kameraet fekk eg ikkje plass til alle på eitt bilete eingong.

På det øverste biletet er det kun sokkar. På det nederste er det ei babybukse, ein babyvest, to sjal, ei hue og ei babyjakke. I tillegg har eg tre bestemorsrutetepper som ikkje er ferdige. Vel. Det er nok å hengja fingrane i.

Målet for prosjektet er at alle pinnane skal vera ledige til 10. juli. Optimist? Eg? Hæ?

Tanken er faktisk så oppskakande at eg trur eg må roa nervene med å leggja opp til ei ny krefthue.

Kveldskos

2010-06-09T21:27:00.002+02:00

Heimalaga skulebolle med masse vaniljekrem (under eit like stort lag med melis og kokos), russesokkstrikk i to av favorittfargane og House på tven.

Kvelden kan ikkje verta betre.

Award

2010-06-06T20:40:00.003+02:00

Eg har fått ein kjempefin award hjå Komadyret. Tusen hjarteleg takk!

Saman med awarden skal ein skriva sju interessante fakta om seg sjølv. Vel. Her kjem dei, interessante eller ei:

1. Eg må alltid ha lydnivået på radioen i bilen på partal når eg køyrer, elles vert eg heilt sett ut.

2. Viss eg trur at arbeidsdagen vert stressande eller tung, står eg opp fem minuttar før tiden, slik at eg rekk eit par omgangar på strikketøyet mitt før eg reiser. Då går alt så mykje betre i løpet av dagen.

3. Eg ELSKAR sjokolade.

4. Eg ser ikkje noko som er lenger vekke enn ein halv meter utan brillene mine.

5. Eg fekk ei geit til konfirmasjonen min. Ho har no fått så mange born og borneborn og sikkert oldeborn også at eg har ikkje kontroll på flokken.

6. Eg har søkt på sjukepleiarskulen, sjølv om eg svimar av kvar gong eg ser ei sprøye.

7. Eg er dårleg på å finna interessante fakta om meg sjølv.

Awarden skal sendast vidare til sju andre bloggarar, men eg klarar ikkje velgja ut sju stykkjer blant den lange og fine bloggelista mi, så eg gir den like godt vekk til alle som er innom og les her! Det er vel fortent.

#51 og #52

2010-05-31T21:53:00.003+02:00

Ferdig! 52 par på eitt år. 104 sokkar.

Eg hadde tenkt å avslutta med stil, men det vart ikkje heilt som planlagt. Men restegarnssokkar til bestefar og blåbærvafler er vel det som er mest representativt for sokkestrikkinga mi, så det passar jo i grunn godt det også.

Sokkane har vore ferdige ei stund, men dårleg bloggelyst har gjort sitt til at det vart utsett til siste stund, difor så dårlege bilete. Men sokkane er i hvert fall strikka!

Kva skal eg strikka no, tru?

Vinnarlukke

2010-05-28T21:07:00.002+02:00

I heile mitt lange liv har eg ikkje vunne så mykje anna enn golvteppe, fjøstermometer og eit glas med blåbærsyltetøy, så gleda var stor då eg oppdaga at eg hadde vunne i Monstermønster si jubileumstrekning i anledning 100 000 besøkande. Og i går fann eg premien i postkassa mi.

Ein boks med knappar! Perlemorsknappar i ein herleg blåfarge og søte treknappar forma som epler og Hello Kitty. Katteknappane passar perfekt på ei jakke til ei lita jente som elskar det japanske dyret.

Så tusen takk for dei fine knappane, Monstermønster.
Bloggen hennar er forresten vel verdt eit besøk. Ho er eit oppkomme av gode idear og inspirasjon! Ta deg ein tur innom, så skal eg lova deg at du finn mykje fint.

Markeringsbehov

2010-05-21T20:18:00.002+02:00

Etter å ha sett mange fine merkelappar rundt omkring i strikkebloggverden, fekk eg lyst på mine eigne. Som tenkt, så gjort og nokre dagar seinare låg dei i postkassa.

Heilt enkle med eit lite hjarte. Plagga mine er jo strikka med omtanke i kvar maske. Teksten er sjølvsagt på skikkeleg norsk.

Eg kjenner at bloggelysta er på opptur, så kanskje vert det ikkje så lenge til neste innlegg.

#48, #49 og #50

2010-04-26T19:06:00.002+02:00

Det er framleis dvaletid her, men no er det haug på ferdige-prosjekt-som-berre-ventar-på-å-bli-teke-bilete-av-og-blogga-posen, så då tok eg meg sjølv i nakken og fekk unna litt.

Først ut er støvelsokkar til meg sjølv. Tynne (i mine auge) sokkar som passar perfekt utanpå eit par med Ulvangsokkar i gummi-, ski- og fjellstøvlar. To rett, to vrang på bråtet og rettstrikka fot sit godt inntil og held seg på plass.

Garnet er Fagstrikk frå Rauma, strikka på pinne nummer 3, størrelse 38.

Dei neste to para er julegåver. Forsettet om ei julegåve i månaden held seg bra etter eit skippertak første veka i april. *Knegg*

Eitt par i damestørrelse og eitt i herrestrørrelse. Strikka i det velkjende blåbærmønsteret og Sterk frå DSA på pinne nummer 3.

Det eine nøstet med grønt garn var nok til ein heil sokk, men det andre var ikkje, så sokk nummer to fekk nokre omgangar med raudt på tuppen.

Djevelske striper

2010-04-09T19:51:00.002+02:00

Bloggelysta har gått i dvale, så ting tek tid her. Desse huene vart ferdige i februar, men eg har ikkje fått dei inn i bloggen før no.

Akutt trang til å bruka opp litt diverse restegarn på anna enn sokkar resulterte i tre små babyhuer.

Den øverste er strikka i Dale babyull, den midterste i Bambino babyull og fleirfarga Regia-sokkegarn og den nederste i Sandnes alpakka. Alle er strikka i same størrelse (6 månadar) på pinne nummer 2.5, men grunna ulik tjukkelse på garnet vart dei ikkje heilt like.

Den nederste gjekk i siste sendinga med krefthuer til St. Olavs hospital. Eg rakk endå litt fleire huer før fristen, men dei kjem i neste blogginnlegg. Viss eg berre får ut fingeren …

Knappefabrikk

2010-04-02T13:33:00.002+02:00

Etter å ha sett på tusenvis av fine stoffknappar rundt omkring på nettet, fekk eg lyst til å laga sjølv. Ein kjapp tur innom Etsy, Stoff og Stil og mamma sitt stofflager førte til dette:

Mine heilt eigne stoffknappar! Fantastisk morosamt putlearbeid, eg kunne ha site heile dagen. Og eg har framleis att mange tomme knappar og fleire meter med stoff, så snart vert nok knappelageret større enn garnlageret.

God påske!

2010-04-01T15:08:00.002+02:00

Denne gjengen ynskjer alle som er innom ei god påske!

Polkagris

2010-03-24T15:37:00.002+01:00

Ein liten stripegensar til nabojenta er ferdig. Då eg valde fargar i butikken tenkte eg ikkje over at ungen vert sjåande ut som ein polkagris, men det vart no litt søtt også.

Oppskrifta er Raglangensar i 3-trådsgarn frå Nøstebarn. Eg bytte ut 3-trådsgarnet deira med Smart. Greitt med noko som kan vaskast i maskin når det er til ein eittåring. Det gjekk med 100 gram kvitt og 127 gram raudt.

Det har vore litt av eit ork å få ferdig denne gensaren, gitt. Først strikka eg i størrelse to år, men ermane vart så gigantiske, så eg fann (i samråd med mamma) ut at eg skulle droppa aukingane, så dei ikkje vart så vide. Då eg hadde strikka begge ermane og bolen og skulle til på raglanfellinga, kom eg på at eg ikkje hadde så mange masker som i oppskrifta, så det vart litt triksing og miksing for å ikkje få ein halsopning på størrelse med ein dorull.

Men eg er visst ikkje heilt der at eg kan juksa med oppskriftene endå, for då eg skulle til på ribbekanten langs halsen var gensaren mildt sagt rar. Fellinga var stygg og armane lange og skeive. Eg kunne ikkje gi vekk noko sånt. Så eg rakk like godt oppatt gensaren… Ein heil liten gensar. Det var så deprimerande at eg mista heilt piffen. Sjølv om eg la opp til ein størrelse mindre og dermed hadde mindre strikkearbeid framfor meg, gjekk det uendeleg sakte framover. Men eg tok meg saman og gjorde ferdig gensaren før det vert badebuksesesong. No angrar eg ikkje eit sekund på at eg rakk opp alt arbeidet mitt, for gensaren vart ti gonger finare enn før.

Så då har eg erfart at nokre gonger er det brutale det beste.

Russesokkar, del 1

2010-03-20T17:34:00.002+01:00

Frå det eine oppdraget til det andre.

Vetlesøster har bestilt sokkar til russeantrekket sitt. Garn og arbeidsteikningar er allereie innkjøpt og laga, så det er visst berre til å kvessa pinnane og setja i gong.

Fortsettelse følgjer.

Bestillingsverk og #47

2010-03-16T16:09:00.002+01:00

Onkel trengde ei gåve til ein liten gut og lurte på om ikkje eg kunne strikka noko som han kunne gje vekk. Glad for å bidra til ei plastleike mindre kjøpt sette eg i gong med oppdraget.

Resultatet vart hue, vottar og sokkar. Litt usikker på kor godt ein fire år gamal gut likar mjuke pakkar, men foreldra vert forhåpentlegvis meir begeistra.

Sterkt inspirert av Tiina og for å gjera det litt meir spanande, fekk eg mamma til å brodera på ein bil med knappar til hjul på venstrevotten og eksosrøyken frå bilen bortover høgrevotten.

Hua og vottane er strikka i NZ lammeull og sokkane i Sildre. For å få litt samanheng strikka eg to striper med petrolfarga NZ lammeull på sokkane, hekla ein kant med brunt rundt hua og broderte med brunt.

Alle oppskriftene er frå Strikk til Nøstebarn, i størrelse ein plass mellom 4 og 5 år, så det kanskje kan brukast til neste år også.

#45 og #46

2010-03-13T17:42:00.002+01:00

Stadig nye par med sokkar vert ferdige, sist ut stripesokkar og svingesokkar.

Stripesokkane er strikka av restegarn. Falk, Robust, Perfect, Safir, Juvel, raggegarn og diverse smånøster utan mageband. Det var så artig å strikka striper i ulike fargar at sokkane vart visst litt for store, men eg håpar at dei tovar seg litt i bruk og vask, så dei passar betre til mottakar.

Kalajoki var eitt av marsmønstera i Tilbehørsalongen på Uformelt. Svingane nedover sokken er inspirert av elva Kalajoki som svingar seg gjennom Finland, derav namnet. Mønsteret var enkelt - kun auking, felling og vridde rettmasker, men resultatet vart veldig stilig.

Eg strikka to repetisjonar av heile diagrammet på leggen og nesten to på foten. I tillegg valde eg å strikka ei anna tåfelling enn i oppskrifta, sidan eg allereie hadde strikka sokken for lang og ikkje kunne ha ei tå på 4 cm. Og nei, eg rekkjer ikkje opp når det ikkje er skikkeleg krisesituasjon.

Hælen, fransk hæl, var ny for meg. Ganske enkel og lik den eg brukar til vanleg. Den vart litt for lang og stor og slaskete, men det er ikkje verre enn å strikka litt færre omganger på hælkappa neste gong.

Alt i alt supernøgd med å ha testa ut ny sokkeoppskrift. Faktisk så nøgd at eg har bestilt meg tre nye strikkebøker med litt meir avanserte sokkar enn to rett, to vrang, så no vert det andre bollar, ikkje berre vafler i bloggen framover.

Håpefulle huer, del 2

2010-03-05T14:50:00.002+01:00

Her kjem andre ladning med huer til kreftavdelinga ved St. Olavs hospital.

Intuitive, strikka i Drops merino extra fine. Mjuk og god hue. Eg tykte holomgangane vart litt tette, men det er lett å fiksa på til neste gong. Elles var oppskrifta veldig enkel å strikka og hua kan brukast på begge sider. Genialt.

Denne skulle eigentleg vetlesøster få, men litt stram mønsterstrikk resulterte i ei hue for små knollar, så ho går til innsamlinga. Strikka i Viking eco alpaca (økologisk ull, jøsses!) etter mønster frå eit Vikinghefte.

Den foreløpig siste hua er Stripey, også denne gongen i Drops karisma. Ho vart litt trang, så eg vil tru at ho passar best til born.

No skal alle huene få seg eit bad i Milovatn og merkelappar med vaskeråd, så er dei klare for sending. Etterpå er det tilbake til sokkestrikkinga. Kan ikkje komma på etterskot med mine 52.

#41, #42, #43 og #44

2010-02-27T20:09:00.002+01:00

Endå fleire sokkar er ferdige.

Det første paret er bidraget mitt i kunstløp, par i OL også. Eg hadde ikkje nok blått garn, men litt kvitt og grønt restegarn gjorde susen.

Dei tre neste er små sokkar til nabojenta. Det gule og det raude paret er strikka i størrelse 2 år, men dei passa akkurat til ho no når ho berre er eitt år, så då strikka eg eit litt større par i lilla, som ho kan ha til seinare.

Snart er plønsjen ferdig. Lurer på kva eg skal strikka på då?

Olympisk mester

2010-02-26T20:05:00.002+01:00

I år har eg delteke i OL. Og det i den seigaste øvelsen av dei alle, nemleg 5-mila. Eg kan melda om fantastisk godt føre, godt feste i oppoverbakkane og god gli nedover.

Og det er sjølvsagt strikke-OL eg snakkar om. ;-)
Uformelt.net arrangerte Vancouver 2010-along samstundes med vinter-OL, så eg meldte meg på slalom (noko med fletter, valfritt prosjekt), kunstløp par (noko i par), utfor (hals) og 5-mil (seige UFO-ar).

Eg ga meg i kast med 5-mila først (alltid godt å vera ferdig med dei tyngste oppoverbakkane). Marie-gensaren har lege på vent sidan oktober i fjor. Det var kun armane og vrangbord nede som mangla, men angst for å gå tom for garn før gensaren var ferdig, gjorde prosjektet til ein UFO. Det er dumt å strikka vidare for å sjå om garnet faktisk tek slutt, difor gøymer me han nederst i korga og latar som ingenting. Vel, vel.

UFO-øvelsen ga meg ein god anledning til å fullføra gensaren. Då eg først sette i gang, gjekk det faktisk rasande fort. Sjokolade som doping er å anbefala. Ikkje vart det tomt for garn heller!

150 gram silkemjuk gensar er resultatet, ein god gullmedalje. Mønsteret er Marie av Britta Wilfert. Garnet er DSA babysilk på pinne nummer 3. Varmt, godt og mjuuuukt.

Elles er eg ferdig med både kunstløp og utfor, men litt fartsskada etter ein heftig utforomgang må slalomen venta til helga.

#39 og #40

2010-02-15T13:58:00.002+01:00

Det er lenge sidan sist no, men det vert strikka litt innimellom alt anna.

Restegarnssokkar til bestefar er siste prosjekt ut. To par, begge er strikka med ein tråd Sisu og ein tråd Drops alpaca. Fin måte å bruka opp diverse restar på, sidan han ikkje bryr seg om fargar.

Par nummer 40 betyr at det berre er tolv par att! Eg ser lyset i enden av tunnelen, sjølv om eg merkar at sokkestrikkelysta har dabba litt av. No har sokkane vorte meir som tanketomme innimellomprosjekt. Men når eg har klart så mange par skal eg jammen klara tolv til.

#38

2010-01-31T15:38:00.002+01:00

Endå eit innimellom-par er ferdig, denne gongen Husbeast socks.

Det er faktisk mitt første fletteprosjekt. Sjølv om eg no har strikka i over eitt år, har eg ikkje hatt mot til å strikka fletter, for det ser jo så avansert ut. Men då dette mønsteret kom som eit alternativ i ein tilbehørsalong på Uformelt, fann eg ut at det er berre til å kasta seg uti det. Som tenkt, så gjort, og det var faktisk ikkje vanskeleg! Berre litt knotete med flettepinnen, men det gjekk seg til etter ei stund. Så no er eg kurert og har allereie fleire huer og sokkar med flettemønster på to-do-lista.

Sokkane er strikka i PT5, på pinne nummer 3, størrelse 42. Yngste onkel ønskjer seg sokkar, så då fann eg ut at dette kunne vera årets første julegåve.

Håpefulle huer

2010-01-30T13:22:00.002+01:00

Obs: langt innlegg.

På eit strikkeforum eg er innom har det tidlegare vore innsamling av huer til kreftavdelingen ved sjukehuset i Oslo og Stavanger, og no er det innsamling til St. Olavs hospital i Trondheim. Slikt må ein bidra til!

Dei siste vekene har eg altså svinga pinnane for eit godt formål, og her kjem resultata så langt:

Først ut er Jacques Cousteau-hat, strikka i Pickles extra fine merino. Garnet er mjukt og godt og forhåpentlegvis kløfritt. Det bestod i hvert fall min kløtest.
Lampa med lampeskjermen stiller som modell, i mangel på frivillige hovud.

Så kjem ei rekkje med heilt enkle huer, alle variasjonar av Pickles sitt Hello New York-vintersett. Det er kun hua til venstre (den med grå striper heilt til topps) som er strikka nøyaktig etter mønsteret. Dei andre er strikka litt kortare. Garnet er igjen Pickles extra fine merino. Grønfargen heiter knæsj mint, og eg kan skriva under på at den er verkeleg KNÆSJ, men det finst vel fargeglade trønderar også.

Nummer sju er Smart-hue, strikka i Smart. Denne hua vart enormt lang, men ho virkar fint med litt lang oppbrett eller som ei baggyhue. No veit eg ikkje om eg tåler mykje, men eg tykte ikkje at denne klødde heller.

Sistemann er Stripey (kun Ravelry-link), mitt favorittmønster. Ikkje det at eg har strikka så mange huer etter mønster, men av dei eg har strikka er Stripey definitivt på førsteplass. Utruleg fin felling i toppen og godt med ekstra foring rundt øyra. Dessutan er mønsteret veldig enkelt, men stilig og dekorativt. Hua er strikka i Drops Karisma, endå ein ny garnfavoritt.

Det var alle huene eg har strikka så langt, men det kjem fleire. Ei er på pinnane og mange andre er planlagt. Kjekt å strikka noko som ikkje treng ein partnar!

Viss du har lyst til å bidra, så finn du informasjon her. Det er endå god tid, frist for innsending av huer er i slutten av mars. Og som ei ekstra gulrot er det lagt opp til konkurranse med to fantastiske premiar, nemleg to hesper med det berømte garnet Wollmeise! Eitt hespe til den som strikkar flest huer og eitt hespe som vert trekt ut tilfeldig blant alle som har bidrege. Så her har alle ein vinnarsjanse, så det er berre til å kasta seg over pinnane.

#37

2010-01-20T20:19:00.002+01:00

Det er dårleg med sokkestrikkelyst for tida, no går det meir i huer og hekling på bestemorsruteteppet mitt. Men eitt og anna par vert då ferdig innimellom.

Siste par ut er blåbærvafler strikka i Sterk på pinne nummer 3. Det gjekk med 2 nøster til størrelse omtrent 43. Mjuke, gode og varme. Håpar dei fell i smak hjå mottakar også.

Varme vottar

2010-01-18T14:03:00.002+01:00

Siste del av pappa sin garderobe består av tova vottar. Dei har vore ferdigstrikka, ferdigtrådfesta, ferdigtova og i bruk i ei veke, men det tek visst litt tid med blogginga for tida.

Oppskrifta fann eg på nettet ein plass, hugsar ikkje heilt kvar. Garnet er Hifa2 frå lageret, heile 116 gram. Vottane vart strikka med enkel tråd på pinne nummer 5,5. Eg fulgte oppskrifta slavisk og det resulterte i GIGANTISKE vottar. Heile armen min fekk plass i ein vott!

Eg var litt skeptisk til at vottane faktisk skulle krympa til brukbar størrelse, men dei vart fine etter fire (!) gongar i maskina, to omganger på 60 grader og to på 40.

Skjerf med stil

2010-01-10T14:30:00.002+01:00

Mange blå skapar som sagt nye behov i heimen. Pappa fann ut at eit skjerf var tingen for å halda kulden ute, men i mangel på eitt i sin eigen garderobe, tok han mamma sitt favorittskjerf. Dameskjerf. Med kattar på. Eg fann fort fram garn i mandige fargar og sette i gang. 3 rett, 3 vrang i to dagar og pappa hadde sitt eige herreskjerf.

Garnet er Schachenmayr nomotta extra merino big (puh), strikka på pinne nummer 4. Koksgrått med lysegrå striper i endane. Det gjekk med sånn omtrent 3 og eit halvt nøste av hovudfargen og eit halvt av stripefargen.

Vottane hans er akkurat ferdigtova og ligg til tørk, så no er alt klart for tur i minusgrader.

#34, #35 og #36

2010-01-09T12:16:00.002+01:00

Tempoet er bra på strikkepinnane i det nye året. Mange dagar fri er lik høg produksjon, også på sokkefronten. Tre nye par er ferdig sidan sist.

Eit blåbærpar, strikka i PT5 på pinne nummer 3, størrelse 40.

Fargerike sokkar til meg sjølv. Strikka i Regia på pinne 2.75, størrelse 38. 12 omgangar ribb og resten glattstrikk. Tynne og gode, perfekte i skisko. Siste par ut er raude vafler, strikka i Sterk, pinne nummer 3, størrelse 40.

Elles er eg ferdig med eit skjerf og snart eit tova vottepar til faderen. 16 minusgrader skapar visst nye behov i heimen, så eg vert ikkje arbeidsledig med det første.

Kavalkade

2009-12-30T16:40:00.002+01:00

2009 har vore mitt første år som “seriøs” strikkar. Tidlegare har eg berre strikka eitt og anna prosjekt på skulen og grytelappar til dei gamle damene i familien. I år har eg strikka for full maskin, og resultatet ser de under.

Det går mest i sokkar, men eit behov for større utfordringar har resultert i litt babyklede også. Pluss huer, pulsvarmarar og isskrapevottar. Til neste år håpar eg på endå meir utviding innanfor fagfeltet.

Det er forresten mange like sokkar i montasjen, men sånn går det når eg strikkar fleire par i same garn og same farge.

Istid

2009-12-27T16:23:00.002+01:00

Innimellom all sokkestrikkinga trengte eg eit par kjappe og enkle prosjekt, så då fall valet på isskrapevottar til dei bilkøyrande i familien. Praktisk når det er vinter og is på bilrutene.

Oppskrifta fann eg her. Det grå og raude garnet er Månetoppen, det blå er PT3. Til den oransje og blåstripete brukte eg dobbel Tove, om eg ikkje hugsar heilt feil. 40 grader i vaskemaskina saman med ein handduk, og svisj, svosj så var fire julepakkar ferdige. Den grå var den første votten eg strikka, så den vart nok litt for lang, men pytt, pytt.

#25, #26, #27, #28, #29, #30, #31, #32 og #33

2009-12-25T13:44:00.003+01:00

Berre 19 par igjen! I sokkegarnskuffa mi har eg garn til det dobbelte, så dette bør gå bra.

Garnet som er brukt er litt diverse. Grøn PT5, lilla PT5, kvit Perfect, grøn, lilla og blå Sildre, sjøgrøn Sterk, brun Perfect, turkis Sisu og Drops alpakka og spraglete Järbo mellanraggi. Pinne nummer 3 på alle para, størrelsar frå 38 til 43.

Samtlege var julegåver, saman med 14 andre par.